Teatru internatzionale in Murera
Dae su 5 a su 9 de cabudanni est in programma su festival InVaso
Dae su 5 a su 9 de cabudanni Murera at a èssere teatru, in pratza Europa, de su InVaso Festival. Sa manifestatzione est organizada dae su sòtziu teatrale La Forgia e dae sa FITA – Federazione Italiana Teatro Amatori.
Sos ispetàculos cumintzant a sas noe de note. S’intrada est de badas. Su 5 est in programma s’operetta Said, de La Forgia, cun su coro Le voci dal mare e cun sos ballerinos de Sugarfoot. A coa Huanita, cummèdia de sos ispagnolos Teatro en Construcción.
Mèrcuris 6 sos ispagnolos Melpomène presentant Cadens e a coa mùsica cun Luigi Lai, Gavino Murgia e Marcello Floris.
Giòbia 7 sos marochinos Comédrama presentant Paroles en l’air e a pustis ddo’est s’esibitzione canora de sas Balentes.
Chenàbura 9 sos portoghesos Ajidanha presentant A deriva e poscas mùsica cun L’Armeria dei briganti.
In prus, dae su 6 a su 9 in su Museo dell’Imprenditorialità Femminile Donna Francesca Sanna Sulis dae sas chimbe e mesu, ogna sero, ddo’at a àere unu laboratòriu cun ognuna de sas cumpangias teatrales.
Sàbadu 10 a sas 20,30 comente sìmbolu de amistade sas diferentes cumpangia ant a prenare unu vasu de terra. A sas 21,00 ùndighi ischentes de su International Theatre Academy of FITA ant a pònnere in iscena La Ballata del Mulino. A sas 22,30 su festival serrat cun sa mùsica de Antonio Sorgentone.