Evviba l’Ischora di Sassaresu!

“Evviba!”, è la cosa chi esci naturari a la fini di lu corsu di sassaresu di l’Ischora di Sassaresu. Orghanizaddu da li sotzii Sa domo de totus di Sassari e Spaciada sa bregùngia di Cagliari, dui orghanismi impignaddi a l’aprobu di lu sardhu, lu corsu à giumpiddu l’ischopu soiu. Vuruddu cun ditzisioni da Cristina Sanna chi à cuurdhinaddu lu corsu e da Giuliano Sanna, l’ischora à immubiddu li passi soi ‘ià da l’inverru passaddu isthirrendi li lizioni da matzu a maggiu pa un tutari di vinti ori i’ la sedi di via Cetti, Isthrinta Buggiosa, e i’ lu museu Bande posthu a dipusizioni da Inoria Bande in via Muroni a Sassari.

E propiu l’althra dì i’ la festha di fini corsu, tenta i’ la sedi prubisoria di Via Torre Tonda, Cristina Sanna à cunsignaddu li tzirthificaddi di fricuentzia a l’ischritti, cuattordhizi passoni, si puru calchunu, a doru mannu, no è ridisciddu a attuppà a chissu eventu. Lu corsu è ‘sthaddu utiri puru pa dà una fuimmazioni linghisthigga a tzincu passoni di l’ischora matessi chi i’ la proba Regionari di Nara-mi so ‘sthaddi aprubaddi, uttinendi lu tzirthificaddu puru da chistha isthituzioni. Un sutzessu cunsidarendi chi li candidaddi regionari pa lu sassaresu erani dodizi in tuttu.

A l’Ischora ani parthitzipaddu prufissiunisthi, operai, pinsiunaddi, isthudianti di li superiori, prufissori e masthri d’ischora, tuschani, napuritani, e pa calche lizioni puru sassaresi emigraddi, segnu di un intaressu vibu chi abisumeu no s’era mai visthu. Tra chisthi v’era chi sabia ‘ià fabiddà in sassaresu, ma chi mancarri abia bisognu propiu di un corsu pa migliurà, althri chi propiu no abiani mai, o guasi mai, ipricaddu chisthu idioma e chi abà ridescini a fà rasgioni cumprindi. 

Lu docenti di lu corsu, Fabritziu Dettori, chi à ritzibuddu da la matessi Cristina Sanna lu tzirthificaddu di docentzia, si dizi «erettrizaddu» a vidé di cumenti si siani tenti risulthaddi cussì althi in poggu tempu. «Lu miresciu è di siguru di l’“isthudianti” chi   ani sighiddu cun afficcu li lizioni in sedi e esercitzi d’ischrittura e di ditzioni puru a casa. Tuttu lu prugettu s’è pisaddu chena nisciuna tutera e finantziamentu isthitutziunari. In pratigga – cuntinua Dettori – tzi semmu tuterendi a la sora. L’ischora è trabagliendi a manera tari chi li chi fabeddani sassaresu, assibisthiani chisthu idioma che linga, e no più che diarettu. Tandu, cumenti varori culturari indì riccunniscissi e d’iviruppà, in una dinamigga automatigga di imitazioni e ripitizioni, i’ lu tempu e i’ li ginnirazioni a vinì. Digussì cument’è pa Li Candareri, pa fà un esenpiu, chi si so ripituddi i’ lu tempu, e so ‘sthaddi imitaddi da li ginnirazioni nobi pa securi cu’ li candareri di li pitzinni, e criadduri, e fintzamenta cun chissi “medi”. I’ l’occasioni di oggi vuraristhia ammintà chi lu corsu è isthaddu dedicaddu a la biadda Gabriella Oggiano, una masthra chi pa dez’anni a varorizaddu lu sassaresu tra li pitzinni di l’ischora di Santu Giuseppi di Sassari, ipirendi chi l’obara soia si un esenpiu».

Cristina vi teni a dì chi «L’afficcu è chissu d’aprubà lu sassaresu, ma puru l’utentzia di lu sassaresu, e tandu l’esercitziu di tutti chissi diritti linghisthigghi chi fintz’abà no so ‘sthaddi apricaddi, cumenti chissi di l’isthudianti di dugna ordhini e gradu chi no so tuteraddi i’ l’ischora. Noi no vurimmu dà imparu di un sassaresu chi isthogghia arriggiddu in tzerthi settori, noi vurimmu chi chistha linga sia torra fabiddadda in famiria, e chi la famiria torria, chena nisciuna varghogna, a fabiddalla in cassisia loggu s’acciappia. A noi intaressa la libarthai di chistha linga; chi dugna pitzinnu sia libaru di ditzidì di fabidalla a drentu e a fóra la crassi d’ischora. Tzi semmu, e in chisthu semmu deteimminaddi, dendi chi fà, in modu chi l’ischora nosthra sia lu frairi di la cussentzia linghisthigga, indì dugna passona chi fabedda sassaresu, o chi in chisthu si riccunnosci, digghia: “Lu sassaresu è la linga mea!”, chisthu è l’oiettibu nosthru pa arribì a vidella che isthrumentu di comunicazioni normari e moderna in tutti li funtzioni soi, tandu uffitziari in tutti li logghi sasseresofoni, mancari umpari puru a lu sardhu».

Li tzirthificaddi di l’ischritti: Enzo Piu, Piero Cornice, Alessandra Chessa, Alessandro P., Giuliano Sanna, Cristina Sanna, Gabriele P., Andrea M., Marcella Mancini, Franca Enna, Antonietta Marica, Antonio Oggiano, Giampaolo Ruggiu, Cinzia Adolfi.

Abà l’ischora, chi abà a cumenti coordhinadora Cristina Sanna, è un’orghanizazioni indipendenti, ma si pruponi pa l’intaressu di lu sassaresu di collaburà cun cassisia.

Francesca Canu