A tzent’anni o A zent’anni? Tz o Z?

Cumenti s’ischribi kisthu auguriu? Pa lu più s’imprea lu sisthema d’ischrittura itarianu. «Un grande equivoco», dizia Leonardo Sole. Di Fabritziu Dettori

A tzent’anni è l’auguriu ki li sassaresi, sobrattuttu a La Faradda di li Candareri, si fazini pari pari cun sintiddu di fraterniddai. Ma cumenti s’ischribi kisthu auguriu? A tzent’anni? A zent’anni? Tz o Z? Lu prubrema printzipari è ki li sassaresi no ani una cussentzia linghisthigga cumpridda ki pensia a dà, puru sottu a lu prufiru di la grafia, una identiddai ipetzifica a lu sassaresu. Pa lu più s’imprea lu sisthema d’ischrittura itarianu pa la linga nosthra akì da tandu v’era la cunvintzioni ki lu sassaresu era unu di li tanti diaretti itariani, lu cridiani li pueti e li vucaburaristhi: «Un grande equivoco», dizia Leonardo Sole, ki à generaddu, cuntinuaba kisthu linghistha, «disfunzioni a tutti i livelli della lingua, con contraddizioni al livello della scrittura».

A li sassaresi, guasi tutti, manca kissa ‘schorarizatzioni ki li fotzia cumprindì la diffarentzia tra una z greipa (tz) e una z dotzi (z), tandu ischribini sighendi unicamenti la didattica imparadda da minoreddi. L’ischurani ki aggiu auddu pa dez’anni no s’ibagliabani mai akì, olthri a l’alfabetu dibessu da kissu itarianu ki l’aggiuddaba, ani imparaddu cu’ l’esercitziu a dà a li parauri li grafemi curripundenti.

Li linghisthi Maurizio Virdis e Riccardo Mura, i l’attoppu di lu 19 di lampada di accannu a Sassari pa la prisintazioni di la botza di lu sassaresu standard, ani dittu una cosa propiamenti impurthanti, e cioè ki li parauri traschritti «devono essere uguali a se stesse».

No si pò ischribì, tandu, la paraura jà indutzidda, cu’ la lenizioni, a esenpiu Zeru. Digussì è, appuntu, jà indutzidda, e cioè mudificadda. La paraura è, infatti, Tzeru, cu’ la Z greipa (tz), “uguale a se stessa” cun kissi segni grafici cunventziunari ki ripettani lu sonu, e è digussì ki dubaristhia assé ischritta: lu tzeru, ki i la prununtzia dibenta pa lenizioni “lu zeru”. Accò ki pa la matessi rasgioni no s’ischribi “lu gani”, ma “lu cani”. Pa cumprinditzi: una cosa è ischribillu lu sassaresu e un’althra è prununtziallu. Un’althra cosa impurthanti è candu a ischumentzu di paraura la tz no s’indotzi mai, e ki ni bogga puru l’ischusa di trattà la z dotzi, akì la lenizioni no v’è propiu. È lu casu, e pongu inogghi soru un esenpiu, di li parauri ki ischumentzani cu’ la Tz antitzipadda da la pripusizioni A, cumenti l’auguriu “A tzent’anni” ki à, appuntu, in manera ciara lu sonu Tz.

Calchunu abarà a dì dì ki si po trattà la Z dotzi itariana dendiri lu sonu sassaresu e puru pa lu fattu ki “ormai” è i la tradizioni. Kisthi cuntzetti parò no so una soruzioni coerenti si si pensa a cantu ani dittu l’aiperthi funtumaddi, e puru akì abarà una pruipittiba insthabiri si cunsidaremmu ki la ginnirazioni noba no cunnosci in generari, o no è paddrona, di lu sassaresu pa dalli la prununtzia justha. A la fini kissu sonu abarà a pirdhissi e s’abarà a dì “Zeru e Zentu”, e no Tzeru e Tzentu”, akì l’egemunia di l’ischora abarà a pisà l’ischurani d’abà sigundu l’alfabetu e la fonia itariani. Saristhia prifiribiri, «Per evitare confusioni e incoerenze, – cuntinnuaba L. Sole – usare per la sorda il tz, presente nella toponomastica e nell’onomastica sarda, e la z semplice per la sonora: tzintzura ‘zanzara’, tzitzì, ‘zigolo’, pezi ‘pece’, ecc.».

L’ipirantzia è ki li sassaresi aggiani a jumpì a un assibisthu nobu e indipendenti di la linga d’eddi ki li porthia a sanà kissi “disfunzioni e contraddizioni” ki dizia Leonardo Sole.

A tzent’anni a tutti!

Fabritziu Dettori

Li foto so pigliaddi da lu ditziunariu curaddu da Franco Enna i lu 1997 pa la Edes e da li carthelli di l’alfabetu sassaresu di una crassi di l’ischora erementari di Santu Giuseppi di Sassari.