Sossu e Sennari, traiporthu pubbriggu integraddu

Da la primma dí di triura Sossu e Sennari abarani a abé un sivvizziu di traiporthu pubbriggu unicu, chi la gesthioni è isthadda affidada a l’ATP, tramite una procedura di gara a evidenzia pubbrigga.

Dui tram abarani a viaggià i’ lu matessi mamentu, unu i’ la Circolare Destra e l’althru i’ la Circolare Sinistra. So dui Mercedes Sprinter longhi setti metri e cun vintottu pusaddoggi.

Li dí di fatturia dugna tram abarà a viaggià 18 volthi, da li setti di manzanu a li dezi mancu vinti di notti. Lu sabaddu e li dí di festha inveci li viaggi sarani 11 pa’ dugna tram e l’orariu da l’ottu di manzanu a li dezi mancu vintizincu di notti.

Li mezi abarani a collegà, a piú di li zoni residenziari, ischori, uffizzi pubbrigghi e l’isthazioni.

Pa’ li dui sindagghi, lu di Sossu Fabrizio Demelas e lu di Sennari Nicola Sassu, è un’occasioni impurthanti pa’ uní ancora di piú li dui biddi di la Romangia e pa’ a ischuminzà a pinsà a un sisthema di traiporthu integraddu a livellu territoriari, primma cun Sassari e dabboi cu’ l’Ariera puru.

Lu riferimentu è a lu collegamentu ferroviariu tra Sossu, Sassari e l’aeroporthu di Fertilia, chi dobaristhia rapprisintà una meta fundamentari pa’ tuttu cantu lu Nordovest di la Sardhigna.

La rearizazioni di chisthu prugettu, prisintaddu in foima assozziadda da li dui municipariddai di la Romangia, è isthadda possibiri grazie a lu finanziamentu di l’assessoraddu a li Traiporthi di la Regioni Autonoma di Sardhigna.

Lu bigliettu costha 1 euro e dura nobanta minuti. V’è finze l’abbonamentu mensiri chi costha 28,5 euro. Si cumpareggia o i’ li sedi di l’ATP in Sassari, in Canigga e in via Tavolara, o i’ l’edicuri e l’isthanghi di li dui biddi o ancora cu’ la app di l’ATP.

Lu bigliettu singuru, lu da nobanta minuti, si po fà puru i’ lu tram e costha, cu’ la maggiorazioni di 50 cintesimi, 1,50 euro.

(gianni muroni)