Zentu dipinti di Liliana Cano i’ lu Padiglioni Tavolara di Sassari
Mosthra didicadda all’artistha da lu 10 di triura a lu 20 di cabidannu. Obbari inediddi, fotografii e materiari d’archiviu pa’ raccuntà più di settant’anni
Sarà inaguradda vennari 10 di triura, a l’ottu a parthi in sera, a lu Padiglioni Eugenio Tavolara di Sassari, la mosthra “Liliana Cano. Il fuoco dentro”. Finz’a a lu 20 di cabbidannu lu pubbricu podarà figgiurà l’obari di una di li personariddai più famaddi di la pintura in Sardhigna i’ lu sigundu Nobizentu. Un’ippusizioni organizadda da lu Comuni di Sassari, cu’ lu sosthegnu di la Regioni Sardhigna, l’aggiuddu di la Fondazioni di Sardhigna e in cullaburazioni sientifigga e organizatiba cu’ l’Archiviu Liliana Cano. Lu percorsu ippusidibu è affidaddu a Davide Mariani, direttori artisthiggu di l’Archiviu Liliana Cano e di lu Museo Diffuso Liliana Cano di Oliena. La mosthra e lu catarugu so isthaddi priparaddi i’ lu progettu Un Ponte per la Cultura: Dialoghi fra Tradizione e Contemporaneità. L’eredità di Alois Ottiger per Sassari, naddu cu’ lu testhamentu di lu filantropu ivizzeru a favori di la ziddai di Sassari e li so’ attividdai culturari.
La vidda artisthigga di Liliana Cano, nadda in Gorizia i’ lu 1924 e mortha i’ lu 2021 in Sassari, undì era arribidda cu’ la famiria i’ lu 1945, parthi da l’anni suzzisibi a la Sigunda Gherra mundiari finz’a a l’ulthima sthasgioni, ivviluppadda tra Sardhigna, Itaria e sud di la Franza. I’ l’obbari di la mosthra vi so li temi prinzipari di la pittura d’edda: la quotidianiddai, lu mondu agropasthorari, lu mitu e la poesia, lu sacru, la figura femminiri, la festha e li riti, tutti canti ipirienzi traifuimaddi in immagini. Li dipinti apparthenini a cullezioni privaddi. Si aggiugnini tre candareri minori di l’anni Settanta, un dipintu mannu di la Faradda di li Candareri e puru la documentazioni fotografigga di un tritticu monumentari ciamaddu Les amants du soleil, fattu i’ lu 1988 pa’ l’Université d’été di Tolone, e puru Primavera, un paesaggiu minori di lu 2020, chi tanca la mosthra. Vent’anni fa la ziddai desi a l’artistha lu Candareri d’Oru Ipiziari cu’ la mutibazioni di l’althu libellu tuccaddu i’ lu settori di l’arthi visivi.
(luca foddai)
(Attività realizzata col contributo della Regione Sardegna – IMPRENTAS 2025-2026. LR 22/2018)
