Marco Filippella presidenti nobu di lu Rotary Club Sassari
Lu 26 di lampada Villa Mimosa à accolthu la zirimonia di lu passaggiu di lu cuddari di lu Rotary Club Sassari tra lu presidenti vecciu Salvatore Naitana e lu nobu Marco Filippella. Un mamentu chi è isthaddu lu 77° di l’isthoria di lu Rotary Club sassaresu, lu primmu i’ la ziddai. Erano prisenti li sozzi cu’ li famirii e l’autoriddai di lu Distretto 2080 di lu Rotary, tra chisthi v’erani lu District International Service Chair Massimo Melis, l’assisthenti di lu Gubernadori vecciu Fernando Ruberti e althri rapprisintanti di club di l’isura.
Salvatore Naitana à vuruddu ammintà li tanti attividdai di lu club i’ l’ulthimu annu. Li più impurthanti so isthaddi la commemorazioni di li caduddi di Nassiriya e di tutti li gherri, li dinà a favori di li criadduri di lu Libano cu’ l’intiressamentu di la Brigata Sassari, la XVIII edizioni di lu premiu litterariu Agniru Canu (Salvator Ruju), l’attoppu cu’ la comuniddai Mondo X di S’Aspru, lu progettu internazionari Scambio Giovani, lu gemellaggiu cu’ lu Rotary Club La Marsa di Tunisi e, pa’ finì, lu viaggiu di li sozzi a Cracovia. Lu mandaddu di Naitana à auddu comenti ulthimu attu impurthanti la cunsegna di l’onorificenza Paul Harris Fellow a li sozzi Paolo Castiglia e Giovanni Fiori.
Lu presidenti nobu Marco Filippella à pigliaddu la paraura dizendi chi lu mandaddu d’eddu sarà caratterizzaddu da li prinzipi di amicizia, equità, incrusioni, dibessiddai e integrità pa’ trabaglià sobra cassisia intaressi pessonari. Vi sarà puru una collaborazioni manna cu’ lu Rotaract e cu’ l’althri club.
È ciambaddu puru lu direttibu. Ni fazini parthi Salvatore Naitana (presidenti uscenti), Giovanni Conoci (presidenti incoming, ovveru di l’annu chi veni), Maria Violante Corda (vicepresidenti), Tonino Vargiu (segretariu), Nico Pinna Parpaglia (tesoriere), Ludovica Manna (paifettu), Maristella Mura, Paolo Castiglia e Giovanni Fiori (cunsiglieri).
La zirimonia s’è tancadda cun un annunziu, i’ la zirimonia ciamadda di “la spillatura”, pa’ l’intradda di un sozziu nobu: Achille Carlini, presidenti di la Confindusthria di la Sardhigna di lu nord e lu zentru, ovveru Sassari, Olbia e Oristano.
(luca foddai)
(Attività realizzata col contributo della Regione Sardegna – IMPRENTAS 2025-2026. LR 22/2018)
