La Cammara di commerciu di Sassari a Udine pa’ la XIV Borsa Mirabilia
Missioni fatta cu’ zincu impresi eccellenti di lu nord Sardhigna
Lu biranciu di la parthizzipazioni di la Cammera di Commerciu di Sassari a la XIV Borsa Mirabilia di lu turismu culthurari e di li produzioni agroarimentari di gariddai è siguramenti positibu. La manifesthazioni era in Udine lu 16 e 17 di lampada e l’enti camerari à accumpagnaddu una deregazioni di zincu impresi di lu territoriu soiu, lu nord Sardhigna intreu.
La Cammara sassaresa è puru soziu fundadori di l’assuzziazioni “Mirabilia – European Network of Unesco Sites”, confimmendi l’impurthanzia soia i’ la varurizzazioni di nord di la Sardhigna. L’attraddori culthurari più mannu è la Faradda di li Candareri, da lu 2013 Patrimoniu Immateriari di Umaniddai Unesco, chi po’ assè un motori potenti di iviruppu economiggu, turismu sosthenibiri e export. Una festha chi debi assè cunsidiradda no soru sassaresa, ma chi intaressa un’area più manna di la ziddai.
Tutti canti l’impresi chi faziani parthi di la deregazioni erani suppurthaddi da li referenti camerari di l’Uffiziu “Progetti di Cooperazione e Strategici” e so isthaddi posthi drentu a l’agenda di attoppi B2B fatti i’ li logghi di Udine Esposizioni. L’Azienda Agricola Montespada, la Cantina Sociale del Vermentino di Monti, l’Azienda Olearia Ezza, l’Oleificio Secchi e lu tour operator Travel Motus ani diarogaddu cun buyer intragni di marchaddi cumenti Usa, Canada, Europa e extra Europa.
La Cammara sassaresa à trabagliaddu umpari a Unioncamere e Isnart, faburendi a l’impresi sardhi l’incumenzu di cullaburazioni commerciari e progetti nobi. Un’occasioni puru pa’ arriggà i’ lu Friuli li saori e l’oipitariddai di lu territoriu sassaresu. La Cammara à daddu cunfeimma cuncreta chi la tutera di li tradizioni po’ abrissi a lu mondu, ginirendi opporthuniddai reari di business pà tuttu lu territoriu.
(lf)
(Attività realizzata col contributo della Regione Sardegna – IMPRENTAS 2025-2026. LR 22/2018)
