Uniss i’ lu mondu

Sassari. Luni 6 di triura, a manzanu, da l’ottu e mezu a l’una e mezu, l’aura consiliari di lu Dipartimentu di Veterinaria in via Vienna abararà a abrì li gianni a la cooperazioni internazionari e a l’eventu “UNISS nel mondo”, didicaddu a li prugetti rearizaddi cu’ l’amparu di la Regioni Sardhigna. Da la Colombia a lu Libano, da lu Ghana a l’Uganda, e dabboi Tunisia, Perù, Venezuela e Angola. L’iniziatiba, moderadda da lu prorettore a l’Orientamentu Antonio Varcasia, affaccu a Camila Gonzalez Rosas di l’Universidad de los Andes e a Simona Gabrielli di La Sapienza di Roma, sarà abertha cun una panoramigga sobra a l’attividdai di la cooperazioni internazionari.

Li prugetti chi anarizzani temi isthrategigghi pa’ l’ivviruppu grobari so divessi. Isthudianti da Venezuela e Angola fabeddarani di incrusioni e foimazioni internazionari cu’ li prugetti Foundation Course e Inclusive UniSS. L’obiettibu è migliurà la competitividdai di l’impresi zootennigghi da latti cu’ l’introduzioni di tecnologii digitari e li buone pratiche agricole. In Perù vi so isthaddi dui iniziatibi coordhinaddi da Graziella Benedetto: una sobra a un orthu urbanu pa’ 25 famiriii emigranti e rifugiaddi, pa’ fa più forthi la sigurezia arimintari; l’althra è un prugettu di foimazioni agraria di l’ischorani di la Media di Santa Anna in Lima, pa’ garanti’ invisthimenti sobra a li competenzi di li generazioni nobi. Ippaziu mannu abarà a assè didicaddu a l’Africa Occidentari undì l’innovazioni è appricadda a li firieri agricuri: li prugetti VARCOR e TERRA, didicaddi a lu recuperu di li resthi di lu cacao, impriaddi cumenti prudotti di la massaria, una “cacaocoltura eroica” in Costa d’Avorio. Ma v’è puru WAEPA, pa’ la tutera di l’eba in Uganda. I’ lu prugramma puru la cullaborazioni fuimatiba tra l’Ubessiddai di Sassari e l’Ischora Naziunari di Sidi Thabet di Tunisi. Dui prugetti sarani fatti in Colombia, impriendi temi cumenti saruddu pubbricu, incrusioni sozziari e valorizzazioni di li comuniddai locari. Lu manzanu sarà tancaddu cu’ la presentazioni di PARASITOONS, punendi umpari lu programma Interreg NEXT MED didicaddu a edutainment e gamification pa’ privinì li zoonosi parassitarii di li creadduri.

https://www.uniss.it/sites/default/files/2026-07/UniSS%20nel%20mondo-%20Locandina%20%2B%20programma-2.pdf

La Regioni Autonoma di la Sardhigna sustheni da umbè d’anni prugetti di cooperazioni internazionari di l’atenei di Sassari e di Castheddu, fendi più forthi la pusizioni di tutta un’isura.

(luca foddai)

(Attività realizzata col contributo della Regione Sardegna – IMPRENTAS 2025-2026. LR 22/2018)