Tranvieri in festha pa’ Santu Cristhovoru
Sabaddu 25 di triura a manzanu l’Intregu, a sera la pruzissioni cu’ l’althri cunfrarii. Lu paraiu nobu è Alberto Gesuino Fois
Chistha dì, sabaddu 25 di triura, lu gremiu di li Tranvieri (Autoferrotranvieri in itarianu) à rinnovaddu la so’ Festha Manna. A manzanu, cumenti fazini tutti li cunfrarii, i’ la cattedrali di Santu Niggora, finidda la messa ziribradda da lu parracu don Eugenio Cavallo, v’è isthadda la zirimonia di l’Intregu, cu’ la bandera manna passadda da lu paraiu uscenti Giovanni Giuseppe Mamusi a lu paraiu nobu Alberto Gesuino Fois. Lu coru “Lachesos” di Mores à cantaddu li canti ririgiosi di la tradizioni sardha. Erani prisenti lu sindagu Giuseppe Mascia, l’assessora comunari Maria Francesca Fantato, li cunsiglieri comunari Francesco Pipia e Gian Franco Tedde, Gianni Sanna, dirigenti di l’Azienda Trasporti Pubblici, umpari a lu presidenti di l’Intergremio Fabio Madau. I’ la primma fira puru l’ex presidenti di l’Atp Paolo Depperu, da l’annu passaddu sozziu onorariu di lu gremiu.
A sera, la pruzissioni cu’ la parthizipazioni di tutti li cunfrarii e lu simuracru di Santu Cristhovoru, patronu di lu gremiu di li Tranvieri. À assintaddu lu curtheggiu don Eugenio Cavallo, parrocu di Santu Niggora. Lu seiviziu musicari è isthaddu eseguiddu da la Banda Giuseppe Verdi. Santu Cristhovoru, come si fazi da umbé d’anni, era carraddu sobra a un furgoni aberthu e no a ipaddi da li purthadori cumenti si fazi pa’ li patroni di l’althri gremi.
La Gremiu di li Tranvieri (Autoferrotranvieri) è lu più giobanu di tutti li cunfrarii attibi in Sassari. È naddu infatti i’ lu 1938 e à la so’ cappella i’ la gesgia di Santa Maria di Belè, in chisthu mamentu ancora tancadda. Fazi parthi di la Faradda da lu 2022, lu penulthimu candareri à assè ammissu a la Festha sassaresa.
Lu curori di la bandera è lu ruiu bordeaux. Vi so li dui immagini di Santu Cristhovoru e di l’isthemma di lu gremiu. Lu candareri è di curori marrò tabaccu e i’ la basi v’è una bombaddura cu’ la foimma di cubba, acchí Santu Cristhovoru è protettori puru di li bottai, affaccu a ferruvieri, automobilisthi, autisthi e viaggiaddori.
(luca foddai)
(Attività realizzata col contributo della Regione Sardegna – IMPRENTAS 2025-2026. LR 22/2018)
