Remo Branca, un artistha sassaresu

Remo Branca è unu di l’artisthi chi ani animaddu la vidda intelletuari di Sassari i’ la primma middai di lu securu passaddu.

Naddu i’ lu 1897, s’era laureaddu in Leggi i’ lu 1921. L’attibiddai soia parò è isthadda l’ischrittura e la pintura. Infatti dabboi di l’isthudi giuridigghi s’era dipromaddu in Belle Arti in Firenze e piú tardhu, a mannu, s’abia pigliaddu finze una laurea in Lettari.

Cattoriggu, è isthaddu lu direttori di Libertà, la ribistha diocesana turritana, i’ lu 1923. La so’ posizioni di antifascistha l’abia custhrintu a fuggissini da Sassari e a rifugiassi a Igresias. Infatti Libertà era isthaddu sequesthraddu da lu Regime piú di una voltha.

In Igresias abia fundaddu un’Ischora d’Arthi. Da inchibi s’era traifiriddu a Aristhanu e, cumenti direttori di l’Isthitutu Magisthrari, a Nuaru e a Novara, e a la fini a Roma, undí abia adiriddu a lu CNL e s’era isthabiriddu dabboi di la gherra.

Cumenti pintori abia impriaddu tennigghi dibessi, ma è i’ la xilografia chi abia ipprimiddu lu megliu di lu tarentu soiu.

Althra passioni manna di Branca era lu cinema. Era cunvintu chi chisthu mezu espressivu abia puru una funzioni didattica impurthanti e a chisthu tema abia dedicaddu puru calche pubbriggazioni.

In piú s’era dedicaddu a la critigga letteraria. Lu piú di li libri soi, cinema a parthi, ani cumenti oggettu la Sardhigna, l’isthoria soia, l’arthi, pa’ funtumà un libru soru La vita nell’arte di Francesco Ciusa, e la letteraddura, in chisthu urthimu casu massimamenti la figura di Grazia Deledda.

No abia mai immintiggaddu la so’ foimazioni cattorigga, cumenti tisthimunieggiani uniguanti tituri: Francesco d’Assisi e Manzella, il santo che ho conosciuto.

Branca è morthu a Roma i’ lu 1988 ma, cumenti abemmu visthu, no abia mai sinsaddu di pinsà a la Sardhigna e a Sassari, undí, ancora isthudianti di Liceo, abia cunnisciddu lu mondu di l’arthi.

(gianni muroni)