I’ l’Asinara un presidiu mediggu pa’ l’isthiu

La Asl di Sassari à comunicaddu chi i’ l’isura di l’Asinara è attivu un presidiu mediggu isthagionari, cu’ la collaborazioni tra Azienda sanitaria, Comuni di Porthu Torra (l’Asinara fazi parthi di lu territoriu porthutorresu), Agenzia Conservatoria di li Costhi, Ente Parchu di l’Asinara e Corpo Italiano di Soccorso dell’Ordine di Malta (Cisom). Lu seiviziu di primmu soccussu è riseivaddu a la pobburazioni e a li turisthi chi arrivini i’ l’isura. Tuttu chisthu è possibiri grazie a la convenzioni fimmadda chi dizi chi so attivi dui ambulatori da li nobi e mezzu a manzanu a li zincu e mezzu a parthi in sera, cu’ una pausa pa’ lu gusthari da li 12.30 a li 14.30. L’ambulatori so attivi a Cala d’Oliva (tel. 3356822199) e a Cala Reale (tel. 3356850707 – 079409420).

Sobra a l’isula vi sarani un’ambulanza e un fuoristrada, cu’ l’attrezzadduri per l’emergenzi. Ma lu seiviziu sarà puru integraddu cu’ l’autoriddai marittima e puru cu’ la reti di emergenza territoriari e li ippidari, undì purthà li passoni maraddi. «Chisthu pa’ noi e pa’ tutti l’amministhazioni chi ni fazini parthi è un impegnu impurthanti. L’obiettivu è garantì la sicurezia sanitaria a li chi in isthiu andani a l’Asinara», dizi Antonio Lorenzo Spano, dirittori ginirari di l’Azienda Sanitaria.

«L’Asinara – è cantu puntuarizza Massimo Mulas, sindagu di Porthu Torra – è un loggu simboricu di lu territoriu nosthru. Dugna isthiu ospita migliaia di visitadori e pa’ chisthu motivu è nezzessariu garantì un presidiu sanitariu, cun un seiviziu essenziari pa’ lu saruddu e la sicurezia di ca vivi i’ l’isola. Ringrazieggiu tutti l’enti e l’operadori chi so collaburendi umpari puru chisth’annu pa’ l’attivazioni di un seiviziu cussì impurthanti».

(luca foddai)

(Attività realizzata col contributo della Regione Sardegna – IMPRENTAS 2025-2026. LR 22/2018)