Ammenti di Sossu

I’ lu 2004 è isciddu un libru, pubbriggaddu da la EDES di Sassari, chi si ciamma Ammenti di la vidda di tandu. L’abia ischrittu Andria Pilo, prufissori sussincu, dedichendiru propiu a la bidda soia.

In una serie di quadri sobra lu tempu di la so’ pizzinnia (Pilo era naddu i’ lu 1924), l’autori fazi una deschrizioni cumpreta di la vidda di una comuniddai chi tandu vibia massimamenti di la massaria.

Lu carendariu di la campagna era lu riferimentu di la genti, umpari cu’ lu di li festhi ririgiosi. E tandu vi so capituri dedicaddi a l’accoltha di l’ariba e a la vinnenna, a la prima comunioni, a l’ozu santu e a lu Coipu di Cristhu.

Ma a piú di la massaria v’era puru lu mondu di la maisthraria. Cussí lu lettori po gudissi uniguanti ritratti, dedicaddi dugnunu a li divessi arthi: lu siddaggiu, lu lusciaggiu e l’isthagneri, pa’ funtumanni calchunu.

Pa’ finí, vi so rizzetti, dicci e un’erencu di isthivigni.

Lu tonu è sempri affettuosu e dugna tantu buglianu, cun chidda autoironia tipigga di l’abitanti di chisthu loggu di la Romangia, a lu puntu di abé intituraddu unu di li capituru I… lu paesi di li macchi.

Cu’ l’ironia parò v’è puru la fierezia, visthu chi in Sossu so naddi passunaggi impurthanti, a livellu poritiggu, letterariu e artisthiggu. Pa’ fa calche innommu, di chiddi funtumaddi da Pilo, Saivadori Farina e Saivadori Cottoni.

A accumpagnà a Pilo in chistha operazioni a middai tra la nosthalgia e l’isthoria, chi finze si è l’isthoria minima di una bidda di Sardhigna, è sempri isthoria, v’è l’amiggu soiu di pizzinnia, cumpagnu d’ischora, di parthiddi di fubba e di duttrina, Nicola Tanda, firoroggu famaddu, eddu puru sussincu, chi abia fimmaddu l’introduzioni.

Ammenti di la vidda di tandu è ischrittu i’ la varieddai sussinca di la linga turritana, cu’ la traduzioni itariana a fronti.

(gianni muroni)