Un guzzu cumenti simburu di l’Isthintini
Lu cumuni à posthu la barcha a l'intradda di la bidda, pa' ammintà lu liammu cu' lu mari
L’Isthintini à abà, i’ la so’ intradda, una barcha, pa’ ammintà, a l’isthintinesi e a l’isthragni, lu liammu di la bidda cu’ lu mari.
È un guzzu, posthu i’ la rotatoria chi z’esci a lu Parco Pineta. L’à rigaraddu a l’ammistristhrazioni cumunari la famiria Schiaffino. L’imbarchazioni era di Giacomo Schiaffino, bonamina, commercialistha, e la dizzisioni di dunallu a lu cumuni l’ani pigliadda la battia Rita Zara e lu figlioru Luca.
Lu guzzu è una barcha tipigga di l’Isthintini. È longu, poggu piú a mancu, da quattru metri e mezu a ottu. Chisthu in parthicurari l’abia fattu lu masthru d’ascia Peppe Benenati.
L’amministrahzioni, primma di impriallu cumenti simburu di la bidda, l’à fattu resthaurà. V’ani trabagliaddu lu masthru d’ascia Alessandro Polese cu’ la collaborazioni di la Se.Ma. Servizi Marini di Luca Schiaffino. A piú d’accunzalu, lu cumuni à dumandaddu d’aggiunnivvi l’aiburu e l’antenna, chi no erani prisenti. In chistha manera ani vuruddu isthabirí un collegamentu cu’ lu Porto Museo delle Vele Latine, inauguraddu i’ lu 2023 a quarant’anni da la primma regata di vera latina organizadda i’ la bidda pa’ ziribrà chistu tipu di vera triangurari carateristhigga di lu Mediterraneu.
Lu guzzu e l’isthoria soia so liaddi a forthi cu’ l’isthoria di l’Isthintini. Sia la famiria di lu masthru d’ascia, Benenati, sia la di li prupiatarii, Schiaffino, so di chiddi famirii sinarischi chi i’ lu 1885 erani isthaddi custhrinti a dagà l’isura di l’Asinara e a dà vidda a la bidda di l’Isthintini.
Tandu lu guzzu, la vera latina e l’Asinara so’ tutti canti prisenti in chistha barcha monumentu chi auni l’essenzia di l’Isthintini.
Cumenti à dittu lu sindaggu Rita Vallebella «è un’omaggiu doverosu a li generazioni di pischadori, masthri d’ascia e marinari chi ani frabbiggadu l’identiddai di la comuniddai nosthra».
(gianni muroni)
