A ischora di sassaresu in Santu Dunaddu
L'Isthitutu Comprensivu di Santu Donaddu di Sassari e l'assuzziazzioni Ischora di sassaresu ani rearizaddu un prugettu pa' li pizzinni
Occannu puru, pa’ lu di tre anni, dabboi di l’ippirienzi di lu 2024 e di lu 2025, li pizzinni di l’Isthitutu Comprensivu di Santu Dunaddu di Sassari ani pududdu isthudià, imparà, cantà e giuggà cu’ la linga turritana.
L’ischora à rearizaddu, pa’ chisthu, li prugetti Insulas, finanziaddi cu’ la Leggi Regionari 22 di lu 2018, chi ampara lu sardhu, lu gaddhuresu, lu sassaresu, l’algharesu e lu tabarchinu.
A li prugetti à collaburaddu l’assuzziazzioni Ischora di sassaresu, chi la presidenti è Cristina Sanna.
Protagonisthi, da lu mesi di ginnaggiu a lu di lampada, so isthaddi li criadduri li l’asilo di via Lamalfa e quattru crassi di l’ischora primaria di via Forlanini e di via Bottego. Tutti canti li pizzini so isthaddi impignaddi i’ li saggi finari di fini d’annu, chi ani fattu in maggiu e in lampada.
A chistha inizziatiba v’ani trabagliaddu la masthra Franca Enna e lu masthru Giampaolo Ruggiu. Umpari cu’ l’usu di la linga li pizzini ani imparaddu puru canzoni cumposthi propiu da Ruggiu: Pa’ cantà, pa’ sunà, Figlioru caru, Torri e Crozi, La me’ tziddai.
Chisthi canzoni so isthaddi impriaddu finze pa’ crià un musical, sempri drentu a lu prugettu, recitaddu e cantaddu da li pizzinni.
L’Ischora di sassaresu, fundadda i’ lu 2022, è mandendi a dananzi un’idea di linga chi z’escia puru a fóra da l’ischora e chi li pizzinni possiani intindí cumenti una cosa d’eddi, liadda a l’identiddai famiriari e zittadina e a lu dibirthimentu, in modu chi fozzia parthi di la vidda di dugna dí e non sia insarradda drentu a li quattru muri di un’aura ischorasthigga.
L’assuzziazzioni s’augureggia, i’ li parauri di la presidenti, chi sia pussibiri, in lu tempu a viní, una collaborazioni cun althri ischori zittadini puru, in manera di dà continuiddai a chisthi inizziatibi e di fà parthizzipà tuttu lu sisthema ischorasthiggu sassaresu.
(gianni muroni)
