Candareri e musica, pa’ diffundì la cultura di Sassari
Finz’a la Faradda di lu 14 d’aosthu uniguanti dì sarani didicaddi a li gremi cun iniziatibi addananzi a li sedi di li cunfrarii, undì sarani cunsentiddi gazebo, musigga e animazioni
L’obiettibu è prumubì la cunniscenzia di li Candareri cu’ li sassaresi e cu’ li turisthi chi d’isthiu so in Sardhigna. Uniguanti dì finz’a la Faradda di lu 14 d’aosthu sarani didicaddi a li gremi, cun eventi dananzi a li sedi di li cunfrarii. Oggi lu sindagu Giuseppi Masia à fimmaddu l’ordhinanza chi disciplina li dibessi manifesthazioni. Un sì a la prigunta di l’Intergremio Città di Sassari e di lu Gremiu di li Massai di regurà l’attoppi, cun gazebo, animazioni, musigga, materiari prumozionari e puru cu’ la pussibiriddai di punì arimenti e lu di bì, pa’ pudì cussì finanzià l’attibiddai di li cunfrarii.
Si parthi dumani, sabaddu 18 di triura, addananzi la sedi di lu Gremiu di li Trapperi, in via Infimmaria Santu Preddu. Vi sarani dabboi l’althri attoppi: lu 31 di triura a lu Gremiu di li Massai in piazza Santa Caddarina, lu 6 d’aosthu pa’ l’iniziatiba “Vie dei Gremi” in via Martino Bologna dananzi a lu Gremiu di li Viaggianti (ciamaddi puru Carrattuneri), in Portha di Sant’Antoni affaccu a la sedi di lu Gremiu di li Frabbiggamuri, in larghu Casaggia undì v’è la sedi di lu Gremiu di li Masthri d’ascia, in Portha d’Utzeri sottu a la sedi di lu Gremiu di li Cazzuraggi, lu 7 di aosthu larghu Macao dananzi a lu Gremiu di li Frairaggi, lu 12 d’aosthu a Pozzu di Bidda undì à la sedi lu Gremiu di li Piccapiddreri e lu 13 d’aosthu in piazza Santu Purinari affaccu a la sedi di lu Gremiu di li Zappadori.
Fissaddi puru li reguri pa la musigga, cunsintidda finz’a la mezzanotti. La dì di la Faradda, lu 14 d’aosthu, l’intrattenimenti musicari sarani pussibiri inveci tra li 10 e li 12.30 cu’ li visthizioni di li candareri.
«Cu’ chistha iniziatiba varorizzemmu una di li tradizioni autentichi di la ziddai nosthra, dendi a li gremi la pussibiriddai d’assè affaccu a li sassaresi e a li visitadori, pa’ fa cunniscì l’isthoria sicurari di Sassari», dizi lu sindagu Giuseppi Mascia. «Pinsemmu chi lu patrimoniu culturari nosthru sia motori di attrazioni turisthigga, chi possia raccuntà l’isthoria e l’anima di la comuniddai sassaresa. Ed è impurthanti invisthì in cultura, acchì significa invisthì i’ lu futuru di la ziddai, i’ l’ecurumia soia e i’ la pussibiriddai di accuglì a lu ca isciubareggia Sassari».
«Li gremi ani un’impurthanzia manna pa’ la vidda di la ziddai. L’Amministhrazioni vo dà una vicinanza no soru simborica ma cuncreta, fendi più forthi lu liaddu cu’ iniziatibi chi dazini visiribiddai manna a tutti li gremi. Tutti chisthu in una ziddai puru turisthigga», so li parauri di l’assessora comunari a la Cultura Nicoletta Puggioni.
(luca foddai)
(Attività realizzata col contributo della Regione Sardegna – IMPRENTAS 2025-2026. LR 22/2018)
