Una frabigga di sogni, Porthu Torra tra la massaria e l’industhria
Lu romanzu di Gian Paolo Bazzoni è una fotografia di un ciambamentu epocari causaddu da la petrolchimica
Pogghi passoni ani daddu tantu a la linga turritana cantu l’à daddu Gian Paolo Bazzoni. Porthuddurresu, naddu i’ lu 1935 e morthu i’ lu 2014, figlioru di lu poeta Peppino, cunnisciddu cumenti Marinaru, Bazzoni à sighiddu eddu puru i’ lu caminu di la produzioni poetica in sassaresu.
L’attibiddai soia parò no s’è fimmadda inogghi. Infatti è isthaddu finze commediografu e lessicografu, lassendi lu Dizionario fraseologico Sassarese-Italiano, umpari cu’ la grammatica Elementi di grammatica sassarese.
A cumprità l’obara soia i’ la linga natiba v’è puru un romanzu: Una frabigga di sogni, isciddu i‘ lu 2001 pubbriggaddu da l’edizioni Magnum.
A piú di lu varori arthistiggu, mannu, lu libru è finze un’anarisi sociorogica di la Sardhigna tra l’anni zinquanta e sessanta di lu securu passaddu, cu’ lu sognu di una vidda migliori senza l’affanni di la campagna chi ani purthaddu genti assai a abbandunà la terra pa’ zirchà furthuna i’ l’industria petrolchimica.
Vidimmu, attrabessu l’occi di l’autori, lu ciambiamentu fisicu e morari di Porthu Torra in chiddu tempu. Tarreni un tempu dedicaddi a la missera inguddiddi da la frabbigga, genti inciggadda da li dinà chi rinnega finze la famiria.
Lu romanzu si po cunsidarà un’aporogu sobra l’abbramiddummini e l’incapazziddai di li sardhi di gudissi lu chi ani, poggu o assai chi sia.
I’ li pagini di Bazzoni pigliani vidda passunaggi, massai, operai e sindacaristhi, pintaddi in manera rearisthigga, senza nisciuna idearizazioni, nemmancu pa’ li campagnori, chi puru rapprisentani l’opposizioni a li sogni di la frabbigga.
A lu centru di tutti eddi v’è lu protagonistha Saivadori, chi, cu’ li so prezi e li so trassi, è l’ippicciu di lu cuntrasthu sozziari di lu tempu e di li contraddizioni soi.
Una frabigga di sogni è tandu lu contu no soru di una ziddai, in un zerthu mamentu isthoriggu, ma è puru una rifressioni sobra la Sardhigna e li probremi soi, chi troppi volthi si zercha di risuiví causendi un mari ancora più mannu.
(gianni muroni)
