Eugenio Bennato e li linghi di mari in Porthu Torra

Lu 3 di triura, pa’ lu festival AsinArt, in Porthu Torra abarani a fà un concerto dedicaddu a li linghi di lu mari.

L’appuntamentu è a li setti di sera i’ lu parco Chico Mendes.

Lu protagonistha prinzipari è Eugenio Bennato, accumpagnaddu da Sonia Totaro, Vincenzo Lambiase e Stefano Simonetta. L’artistha napuritanu abarà a prisintà li canzoni di un repertoriu chi attrabessa li tradizioni di l’Itaria meridionari, da Napuri a la Puglia.

Primma d’eddu so in programma l’esibizioni di quattru artisthi sardhi, dugnunu in raprisintanzia di unu di li fabeddi di Sardhigna.

Vi sarà lu poeta lurisincu Gigi Angeli, chi ischribi in sardhu e in gadduresu puru. L’ulthimi raccolthi di vessi soi so Aiti e Vadi, in gadduresu, e Aidos e Bados, in sardhu, pubbriggaddi da la Taphros edizioni di Terranoba.

Dabboi l’algharesu Davide Casu, chi i’ lu caddaranu di l’Ariera ischribi poesii e canzoni. Pa’ lu tabarchinu è pribistha la prisenzia di Matteo Leone, chiterristha blues di Calasetta. In piú, pa’ la linga turritana vi sarà lu porthuddurresu Federico Marras Perantoni.

Tuti e tre ani auddu un’ippirienzia i’ lu premiu Andrea Parodi.

Casu, cu’ la canzona Santa Eulalia i’ l’edizioni 2015, è isthaddu premiaddu pa’ lu megliu testhu e la megliu musigga.

Leone à vintu lu premiu i’ lu 2021 cun In mézu ô mò.

Marras inveci i’ l’edizioni 2019 è istaddu premiaddu pa’ lu megliu testhu pa’ Canzona di mari n.2 – Foggu e fiàra.

A accumpagnalli tutti e quattru, Angeli, Casu, Leone e Marras, vi sarani li musicisthi Alessandro Zolo e Paolo Zuddas.

A la fini è in programma un dj set a tema. Lu concerto è indibbadda. Si po prenotà finza a esaurimentu posthi a info.caats@gmail.com e +393517315263.

AsinArt è organizaddu da l’assozziazzioni culturari CAATS, Cunsorziu Artistas Artesanos Turritanos Sardos, umpari cu’ lu cumuni di Porthu Torra, Fondazione di Sardegna, Porto Torres-Eventi e Cultura.

(gianni muroni)