Sassari à ziribraddu la Madonnina: arimani la pruzzissioni surenni
Nosthra Signora è la compatrona di la ziddai. La prima voltha di l’azzibeschamu nobu Francesco Soddu
Arimani, dumenigga 31 maggiu, la ziddai à rinnovaddu l’imprummissa a Nosthra Signora di li Grazi. Era lu 1943, candu l’allora azzibeschamu monsigno’ Arcangelo Mazzotti, fraddi minori franzischanu, cunsacresi Sassari a la Vergine, parchì fussia saivvadda da li bumbardhamenti chi l’Alleaddi anglo-americani erani fendi sobbra a li ziddai itariani. La pruzessioni inveci è di lu 1944 e da allora si ripeti l’ulthima dumenigga di maggiu.
A li zincu monsigno’ Soddu à ziribraddu a Santu Niggora la surenni messa pontificari, presenti lu Capitolo Turritano, li fideri, li autoriddai miritari e zibiri. Addabboi li sei e mezzu è parthudda la pruzzissioni, cu tutti canti li gremi, li gruppi parrocchiani, li cunfrarii, li scout, li riligiosi e li fraddi. Nosthra Signora è isthadda purthadda, cumenti vo la tradizioni, da una rappresentanzia di pompieri. Addananzi a edda l’azzibescamu, a la prima vortha soia. Addareddu a lu simuracru, la Munizipariddai, cu’ lu sindaggu Giuseppe Mascia, la Giunta, cunsiglieri regionali e comunari e althri esponenti di l’enti amministhratibi, umpari a la polizia locari, guidadda da lu comandanti Gianni Serra. Dui li bandi musicari: la Banda Giuseppe Verdi e lu Corpo Bandistico Luigi Canepa.
La prozessioni s’è fimmadda i’ li sosthi crassigghi, a lu Policlinico e al Giovanni XXIII in viale Italia e a l’ippidari Santissima Annunziata. Migliaia li passoni a li lati, chi àni assisthiddu a lu passaggiu di la Madonnina.
A li 20 l’arrivu i’ lu piazzale di Santu Preddu in Silki, indì l’azzibeschamu e lu sindaggu àni liggiddu l’Attu di cunsagrazioni a Nosthra Signora di li Grazii. «Lu simuracru di la Vergine è turraddu a lu Santuariu di Santu Preddu. Abemmu attrabissaddu li carreri, un segnu di la prisenzia di Maria i’ la ziddai nosthra», à dittu monsigno’ Soddu.
A concrusioni di la ziribrazioni lu simuracru di la Madonnina è isthaddu sisthimaddu da lu padri guardhianu di lu Santuariu Massimo Chieruzzi (OFM) i’ la nicchia soia sobbra a l’althari mannu i’ la gesgia, presenti azzibeschamu, sindaggu e li gremi, in parthicurari li Massai, chi àni propiu Nosthra Signora cumenti patrona di la cunfraria.
(lf)
Attività realizzata col contributo della Regione Sardegna – IMPRENTAS 2025-2026. LR 22/2018
