Conseivatoriu “Canepa”, i’ lu Triatu Comunari lu cunzerthu di fini d’annu accademicu

Vennari 29 di maggio i’ lu Triatu Cumunari di Cappuzzini lu Conseivatoriu musicari “Luigi Canepa” à pruposthu a lu prubbicu sassaresu lu cunzerthu di fini d’annu accademicu. Una tradizioni chi si rinnoba dugna voltha i’ lu mesi di maggiu. Abà puru l’orchesthra sinfonigga è isthadda dirigidda da lu masthru Andrea Barizza. È cumpostha da li isthudianti e da li prufissori di lu “Canepa”, umpari a li vinzidori di un isciobaru in drentu. Sobra a lu palchuscenicu di lu Triatu Comunari so azzaddi cussì Antonello Porcu (frautu) e Francesca Floris (chiterra).

La siradda è isthadda abertha da li saruddi di lu direttori di lu Conseivatoriu Andrea Ivaldi e di lu presidenti Antonio Ligios. Addabboi d’eddi l’orchesthra à sunaddu lu Concertino pa’ frautu e orchesthra op. 107 di Cécile Chaminade, cu’ lu soristha Antonello Porcu, e li Danzi slavi n. 1, 5, 6, 7, 8 di Antonín Dvořák. La sigunda parthi s’è abertha cu’ la Fantasia para un gentilhombre di Joaquín Rodrigo, una cumpusizioni bedda assai di ippirazioni ipagnora. Braba Francesca Floris, chi addabboi à fattu un appraudiddu bis soristhiggu, la miruria messicana Por ti mi corazón di Manuel Ponce.

L’ulthima cumposizioni di lu prugramma era la Sinfunia in Re maggiore n. 35 K385 “Haffner” di Wolfgang Amadeus Mozart, cabbu d’obbara, unu di li tanti, di lu geniu di Salisburgo. Mozart cumpunisi dui vessioni. La primma, ischritta i’ la ziddai di Vienna i’ la middai di lu 1782, era una sirinadda, divessa parò da un’althra sirinadda, dedicadda sempri a Sigmund Haffner, i’ lu 1776; la di dui era una sinfonia, cumpunidda i’ lu branu di lu 1783 pa’ la nomina di Haffner, amiggu di lu babbu di Wolfgang, Leopold, a Edler von Imbachhausen.

L’orchesthra sinfonigga di lu “Canepa” puru in chistha occasioni à cunfimmaddu lu livellu mannu di la “resa acustica”. Una dimusthrazioni noba di lu trabagliu impriaddu i’ lu Conservatoriu.

(luca foddai)