Linga materna e plurilinguismu
Il 15 giugno l’Istitutu Bellieni organizeggia un’iniziatiba i’ la Bibrioteca Unibessiddaria
Lunedi 15 di lampada a li zincu e mezzu i’ la Bibrioteca Unibessiddaria di Sassari i’ piazza Fiume un attoppu dedicaddu a li linghi materni purtharà isthudiosi e passoni amantiosi a cunfruntassi sobbra a temi cumenti l’impurthanzia di lu plurilinguismu e la tutera di li minoranzi linghistigghi.
Un’inizziatiba intituradda “Giornata internazionale della lingua materna e Giornata europea delle lingue: affinità e obiettivi” e chi fazi parthi di lu Programma 2026 di l’Istitutu d’Isthudi e Zercha Camillu Bellieni. L’obiettibu parthicurari è apprittà una rifrissioni manna dedicadda a la saivaguardhia e a la traimmissioni di li patrimoni linghisthigghi, chi andani visthi no cumenti abbarraddoggi isthorigghi ma cumenti isthrumenti di incrusioni suzziari e coesioni naturari.
A fabiddà cu’ lu prubbicu di identiddai, isthoria e visioni di lu futuru sarani li cumpunenti di l’Osseivatoriu linghisthiggu di l’Istitutu Bellieni: Mario Lucio Marras si cunzitrarà sobbra a l’impurthanzia di li modi di dì e di li dicci di la tradizioni sassaresa; Immacolata Salis prupunirà “un tributo al sacrificio vs il valore del plurilinguismo”; Daniela Masia Urgu anarizzarà dui ricurrenzi manni criaddi da l’Unesco, la Dì internazionari di li linghi materni di lu 21 di fribbaggiu e la Dì europea di li linghi di lu 26 di cabidannu.
Zittadini, isthudianti, prufissori e appassiunaddi podarani parthizipà a un mamentu di cunfrontu aberthu, fundamentari pa’ ricunniscì i’ li linghi minoriddari un patrimoniu vibu chi si debi traimmittì a li ginirazioni di lu dumani.
Vi sarà puru Beniamina Mercante, zerchadora di l’Unibessiddai di Sassari, chi illusthrarà li liadduri tra neuroscienzi e linghi minoriddaddi cu’ un focus dedicaddu a li binifizzi cugnitibi liaddi a lu bilinghismu e a l’impreu di li codizi di lu loggu.
Previsthi puru li tisthimunianzi di li obbaradori linghisthigghi di lu Bellieni.
L’attoppu è finanziaddu da la Regioni Sardhigna e à lu patrociniu di lu Comuni di Sassari.
(lf)
(Attività realizzata col contributo della Regione Sardegna – IMPRENTAS 2025-2026. LR 22/2018)
