Fubba e linghi creori
I' li mundiari so prisenti nazioni cun fabeddi parthicurari
Tre di li naziunari di fubba chi so giugghendi lu mundiari di Isthaddi Uniddi, Canadà e Messicu so auniddi da lu fattu di assè la rapprisintanzia ippurthiba di nazioni minori e in più parchí in chisthi logghi si fabeddani linghi creori.
In Haiti, indipendenti da lu 1804, la pobburazioni, cuasi di lu tuttu di ginia africana, à mantinuddu la linga di l’isthaddu chi era coronia, la Franza.
In più parò s’è ivviruppadu, in chistha chi è la parthi occidentari di l’isura di Hispaniola, un lingaggiu chi è una foima simprificadda di franzesu, chi è, umpari cu’ la linga di Moliere, uffizziari.
I’ l’althra isura caraibica, Curaçao, v’è una situazioni simiri. Curaçao è un isthaddu custhitutibu di lu Regnu di li Paesi Bassi, chi incrudi, a più di l’Olanda, Aruba e Sint Maarten. La linga cundibisa è l’olandesu, ma in Curaçao l’80%, poggu piú a mancu, di la genti fabedda puru lu papiamento. È una linga nadda da lu portoghesu, chi dabboi à rizzibiddu erementi di l’ippagnoru e calche paraura olandesa e puru di l’indigeni arawak.
A l’althra parthi di l’Oceanu Atranticu, a occi a la custhera africana, v’è l’azziperagu di Cabbu Verdhi. Ex coronia portoghesa, indipendenti da lu 1975, à mantinuddu cumenti linga uffizziari la di Lisbona. Inchibi puru parò vi n’è un’althra, di uffizziari. È lu creoru cabbuverdhianu, lu piú antiggu di li creori. Chisthu puru è una versioni simprificadda, cun elementi di li linghi africani, di lu portoghesu.
Li linghi creori so chiddi naddi da una linga europea in ambienti extraeuropeu. Da lu cuntattu di la linga europea cun erementi di linghi locari nasci lu pidgin, è a dí una linga, chi po assé ippagnoru, ingresu, franzesu, portoghesu o olandesu, simprificadda. Candu chisthu pidgin ischumenza a assé la linga materna di la pobburazioni locari tandu si fabedda di linga creora, chi piglia l’innommu da creoru, chi, in America Latina, è la paraura chi indicaba l’americani di sangu europeu.
(gianni muroni)
(Attività realizzata col contributo della Regione Sardegna – IMPRENTAS 2025-2026. LR 22/2018)
