Un’odissea ‘e rimas nobas, un omaggiu a la poesia di Sardhigna
Lu documentariu è un viaggiu tra li dibessi foimi poetigghi di l'Isura
Un’odissea ‘e rimas nobas è un documentariu, dedicaddu a la poesia sardha, chi nasci da un’idea di Nicola Tanda, intelletuari sussincu, firòrogu e prufissori universitàriu pa’ tant’anni in Sassari, morthu i’ lu 2016, rearizadda da lu figlioru Ugo, impari a Roberto Priamo Sechi.
È un viaggiu chi ischumenza cu’ li cantadori a poesia, cu’ li bozi di Giuseppe Porcu e Bruno Agus, pa’ arribí a lu Premio Ozieri, chi, isthituiddu i’ lu 1956 da Tonino Ledda, sighi a assé un riferimentu, forsi lu più impurthanti, pa’ tutti lu poeti di l’Isura.
Lu tituru è la citazioni di un versu di una poesia di Predu Mura, Fippo operaiu ‘e luche soliana, unu di li primmi a rinnubà lu canone poeticu sardhu.
La poesia l’intindimmu recitadda da Clara Farina, chi i’ l’interventi soi ammenta puru la figura di un althru poeta, Antoninu Mura Ena.
Mura, ammintaddu da la nura Nereide, e Mura Ena, lu primu raminaggiu di Isili traifiriddu a Nuaru, li sigundu bonesu fattu mannu in Lula, erani dui li li poeti più isthimaddi da Nicola Tanda.
Chisthi dui pessonaggi, dizi lu prufissori di l’unibessiddai di Sassari Dino Manca, so isciddi a pizu pròpiu grazie a li premi di poesia.
Lu filmi ammosthra li dibessi cari di la poesia di Sardhigna, generazionari e linguisthigghi. Vi so Giovanni Fiori, ittiresu abà di più di novant’anni, e li più giobani, Antonio Brundu e Rachel Falchi. V’è lu sardhu e v’è lu castheddanesu, rapprisintaddu da Giuseppe Tirotto.
Paolo Pillonca, bonanima, fazi da liammu tra la poesia cantadda in palchu e la di li premi.
Vi so puru interventi di lu cantadori Giuseppe Porcu, di la poetessa Anna Cristina Serra, di Antonio Canalis, segretariu isthoricu di lu Premio Ozieri e di Salvatore Tola, critiggu e isthudiosu di letteraddura sardha.
Un’odissea e’ rimas nobas, isciddu i’ lu 2019, è una produzioni di lu Pen Sardegna, firiari isurana di lu Pen International, cu’ l’aggiuddu e la collaborazioni di Fondazione di Sardegna, ISRE e Premio ozieri. La sceneggiaddura è di Ugo Tanda e di Roberto Priamo Sechi chi è puru lu registha.
(gianni muroni)
