Viurenzia in Sassari, Babudieri (FdI): «Abà bastha»

Un althru mamentu di viurenzia i’ la ziddai, sempri i’ lu centru soiu, è suzzessu in chisthi dì. Dui ommini di lu nord Africa so isthaddi protagonisthi di un episodiu, lu di tanti, chi si ripetini i’ l’ulthimi cheddi. Un affarratoriu, chena cunsiguenzi pa’ forthuna, chi parò rapprisentani l‘ippia di un maresseri suzziari chi no po’ assè sottuvarutaddu. L’assentadori di Fraddeddi d’Itaria Sassari Luca Babudieri à affidaddu la pusizioni di lu parthiddu soiu a una nota pa’ li giornari. «Chisthu ulthimu è soru l’ennesimu episodiu grabi assai chi vedi protagonisthi zittadini isthragni. Vi so isthaddi althri fatti da poggu tempu, cumenti l’aggrissioni a una signora cu’ un cultheddu in un centru commerciari e l’immagini indicurosi di viurenzia i’ lu centru isthoriggu, cu’ passoni si affruntabani impriendi zinturi.

«Semmu addananzi a una ipirari di degradu e insigurezia, chi anda da tempu mannu e chi tocca tutta canta la ziddai. Sassari no po’ dibintà terra di nisciunu. La parthi antigga à d’assè un loggu pa’ li famirii e pa’ isthudianti, trabagliadori e butreaggi – dizi l’assentadori di Fraddeddi d’Itaria –. Ca isciobara di vibì in Sassari debi cumprindì una cosa simprizi: li reguri si ripeittani, no s’anda in giru aimmaddi, no si risuivini li frizioni fra gruppi cu’ la viurenzia. Ca veni in Itaria debi osseivà li leggi nosthri, lu vivì umpari ziviri e li prinzipi di la comuniddai nosthra. Ca pensa chi po’ fa tuttu cantu chi vo traifuimendi Sassari in una ziddai viurenta no è benvinuddu».

«Abà domandemmu un’azioni lesthra di tutti li isthituzioni pa’ punì dugna soruzioni pa’ garantì la sigurezia in dugna loggu, in parthicurari in Sassari vecciu, da umbè di tempu triatu tristhi di viurenzi e chi li sassaresi so lassendi pa’ andà in althri parthi di la ziddai», concrudi Luca Babudieri.

(luca foddai)

Attività realizzata col contributo della Regione Sardegna – IMPRENTAS 2025-2026. LR 22/2018