Climintina, un contu di passioni in sassaresu

I’ lu 1992 lu premiu letterariu Casteddu de sa Fae, dedicaddu a li libri ischritti in sardhu o i’ l’althri linghi di Sardhinga, l’abiani vintu dui romanzi in dui di li vareddai di lu Cabbu di Sobra: lu sassaresu e lu maddaleninu.

I’ l’idioma isuranu era ischrittu Di stenciu a manu mancina, di Gian Carlo Tusceri, inveci in sassaresu era Climintina, di Palmiro De Giovanni.

Autori cunnisciddu e raffinaddu di poesii in turritanu, De Giovanni abia vuruddu punissi a la proba cu’ la prosa puru.

Lu risulthaddu è un giallo ambientaddu in un loggu di mari di Sardhigna, ciamaddu cun un innommu di fantasia Orviles.

Ma, piú di la trama, a rindí interessanti l’obara è la figura di la protagonistha, chi dazi lu tituru a lu libru, Climintina appuntu.

Un passunaggiu forthi, interigenti e pienu di passioni.

Lu contu s’ivviruppeggia tra passaddu e prisenti, lassendi a la fini lu mutibu e la causa di l’avvenimenti chi ponini in motu la narrazioni.

Tuttu a inghiriu di Climintina Aramu, pa’ l’ammigghi Tina, si mobini althri passunaggi, eddi puru sisthaddi a arthi, in modu di falli piglià vidda i’ li pagini, da De Giovanni.

I’ lu romanzu so prisenti lu cuntrasthu tra la bidda e la ziddai, tra la genti ricca e li piú pobari, tra li chi si zi so andaddi e ani fattu furthuna in terramanna e li chi so rimasthi a vibí la vidda si sempri e, ed è forsi chistha la contrapposizioni piú impurthanti, tra li femmini e li masci.

Vi so puru erementi di psicanarisi, prisenti in un sognu fattu da Climintina. Ma, a la fini, lu chi fazi mubí la protagonistha, lu cori di lu romanzu, è l’amori. No è indibbadda chi De Giovanni abbri lu romanzu cun chisthi parauri di Nietzsche: “Lu chi si fazi pa amori si fazi sempri a inchiddà di lu be’ e di lu mari”.

Climintina è isciddu i’ lu 1993, pubbriggaddu da lu Consorzio per la Pubblica Lettura Sebastiano Satta di Nuaru cun lu’ patronaddu di lu Cumuni di Posada.

(gianni muroni)