I’ L’Isthintini la prima edizione di lu “Tonnara Fest – Festa della Tonnara”

Vennari s’è abertha la primma edizioni di lu “Tonnara Fest- Festa della Tonnara”, manifesthazioni culthurari, antropologica ed enogastronomigga, tre dì da lu 26 a lu 28 di lampada. Lo slogan soiu è “Il gusto della nostra terra e del nostro mare”, un eventu naddu pa ziribrà l’identiddai di la bidda marinara, liadda cu’ l’isthoria di la tonnara.

I’ la primma dì v’è isthaddu un impurthanti attoppu a lu MuT (Musei di la Tonnara), prisenti li più manni autoriddai ziviri e miritari di lu territoriu, in primma fila a cunfimmà chisthu mamentu isthroriggu e di la tradizioni. À pigliaddu la paraura Franco Dettori, presidenti di lu zentru commerciari naturari di L’Isthintini, chi ha posthu afficcu a lu trabagliu di la produzioni e di l’acurumia intrea di lu paesi: «Tutti, butreaggi, arthiggiani e risthoradori ani riposu cun intusiaimmu a chistha primma edizioni. Lu Tonnara Fest è un’occasioni pa’ promubì l’eccellenzi enogastronomigghi a chilometru zero, impriendi una rete commerciari e rigarendi a li visitadori un’ipirienzia unica».

Paruari cunfimmaddi da la sindaga Rita Limbania Vallebella: «L’Isthintini s’è raccuntendi funtumendi lu mari, la tonnara e la so’ anima. Chisthu festival è puru un tributu a li radizi nosthri e a li chi ani riarizzaddu la comuniddai nosthra». So isthaddi proiettaddi documenti isthorigghi  e la sindaga ha anarizaddu li dati di l’archiviu sobra a la poburazioni residenti a Cala d’Oliva, La Reale e Fornelli i’ l’Asinara e cu’ li manifesthi d’epoca di pischadori e pasthori.

Marta Diana, assessora a la Culthura e lu Turismu, à daddu amparu a l’impreu isthrategiggu di l’eventu pa’ l’offertha turisthigga locari. «Lu Tonnara Fest poni umpari la memoria i lu futuru economiggu di L’Isthintini. La culthura di lu mari nosthru po’ assè un voranu pa un turismu consapevori e di gariddai, pa fà cunniscì lu borgu nosthru a piú di la biddezia di li ipiaggi».

Finz’a dumenigga vi sarani laboratori, mosthri e degusthazioni. Tuttu cu’ lu patrociniu di lu Municipiu, di la Pro loco, di la Regioni Sardhigna, di la Fondazioni di Sardhigna e di la reti Visit Stintino.

(gianni muroni)

(Attività realizzata col contributo della Regione Sardegna – IMPRENTAS 2025-2026. LR 22/2018)