Vivaldi i’ la Billellera di Sossu
Lu 27 di lampada ippittacuru musiggari di l’Ente Concerti Marialisa de Carolis
I’ la Billellera di Sossu sabaddu 27 di lampada a li 9 a sera vi sarà lu primmu ippittacuru musiggari chi vedi umpari lu Municipiu di Sossu e l’Ente Concerti Marialisa de Carolis di Sassari: “Le Quattro Stagioni”, zeribri cumpusizioni buggadda da la raccolta “Il Cimento dell’armonia e dell’inventione” di Antonio Vivaldi. Sarani sunaddi da l’orchesthra d’archi di lu Ente Concerti cu’ Michelangelo Lentini a lu viurinu soristha. Lu pubbriggu podarà assisthí indibbadda a lu cunzerthu e sarà pussibiri intrà finz’a a esaurimentu di li posthi.
No sarà parò un cunzerthu cumenti l’althri. Lu soristha fabiddarà cu’ l’ippittadori, sighendi l’indicazioni di li sunetti di Vivaldi chi accumpagnani la musigga. Dabboi di chistha anarisi, dugna Sthasgioni sarà sunadda intrea. Una soruzioni dibessa e originari, ma chi no è inusuari. “Le Quattro Stagioni” so’ cunsidiraddi la prima cumposizioni “a soggetto” di l’isthoria di la musigga. L’obiettibu è arribí a tutti canti, da li piú giobani a li piú manni. «Semmu cuntenti di accuglí chisthu primmu attoppu naddu da la collaburazioni tra Municipiu di Sossu e l’Ente Concerti sassaresu, una di l’isthituzioni musiggari piú impurthanti di la Sardhigna – dizi lu sindaggu Fabrizio Demelas –. E fallu i’ l’Anfiteatru di la Billellera à un significaddu parthicurari: offrí a li zittadini ma puru a li visitaddori un’ippirienzia culthurari di libellu althu, in un attoppu tra arthi, isthoria e loggu. Torru grazie a lu presidenti di l’Ente Antonello Mattone, a lu so’ direttori Alberto Gazale, a lu masthru Michelangelo Lentini, a l’orchesthra e a tutti li chi ani contribuiddu a chisthu eventu. L’auguriu è chi sia lu primmu di una collaburazioni longa pa’ raffuzzà la pusizioni di la ziddai nosthra i’ lu panorama culthurari di la Sardhigna».
«L’attividdai di l’Ente Concerti de Carolis è abbertha a tuttu lu territoriu di la Ziddai Metropolitana di Sassari, chi i’ lu mesi di triura incrudi L’Alghero Festival e lu Festival di li ziddai regii, no soru Sassari ma puru L’Ariera e Castheddusardhu», ammenta Antonello Mattone, presidenti di lu de Carolis.
(gianni muroni)
(Attività realizzata col contributo della Regione Sardegna – IMPRENTAS 2025-2026. LR 22/2018)
