L’azzibeschamu Varesini, unu di li piú manni i’ l’isthoria di Sassari

La figura di Monsignò Varesini, azzibeschamu di Sassari da lu 1838 a lu 1864, è una di li piú impurthanti i’ l’isthoria di l’episcopaddu sardhu e massimamenti di lu di lu Cabbu di Sobra.

Era naddu in Casal Cermelli, in Piemonte, a la fini di lu di dizottu securi.

Arribiddu a Sassari s’era impignaddu in obari d’assisthenzia, cumenti l’ippidari, e abia resthauraddu lu siminariu.

In Santu Bainzu, in Porthu Torra, abia resthauraddu, di busciaccara soia, i’ li cappelli sutterranei, li tumbi di li marthiri turritani.

In Sassari s’era agattaddu in mezu a li cuntierri puritigghi di lu tempu. A un’ara v’erani li moderaddi, rapprisintaddi massimamenti da Pasquale Tola, a l’althra li rivoruzionari, chi abiani cumenti riferimentu a Antoniccu Satta, mazzinianu, chi era turraddu in Sardhigna da l’Inghilterra.

Propiu li parthigiani di Satta l’abiani aggrididdu, i’ lu 1848, in piazza Santa Caddarina, abà piazza Azuni. Pa’ chisthu a Satta l’abiani arristhaddu.

Ma li probremi di lu preladdu piemotesu no erani finiddi inghibi, vithu chi i’ lu 1850, pa’ la so’ opposizioni a li leggi Siccardi, chi pribabani la gesgia di unigaunti priviregi, o diritti, sigundu lu puntu di vistha, ossia foro eccresiasthiggu, dirittu d’asilo e manomorta, è a dí chi li beni eccresiathigghi non si pudiani tassà, s’abia fattu un mesi di prisgioni domiciriari.

A piú di l’obari già funtumaddi Alessandro Domenico Varesini à lassaddu a Sassari un monumentu letterariu chi è lu Brevi Catechismu traduziddu da l’italianu.

Pubbriggaddu i’ lu 1857, è un catechismu bilingui, cun una traduzioni in sassaresu anonima. L’intenzioni di l’azzibeschamu era di dà a la pobburazioni, chi cumprindia, da poggu piú a mancu, l’itarianu, ma no lu fabiddaba, una versioni fideri di lu cumpendiu di la fedi cattorigga i’ la linga di la genti, ossia lu turritanu.

Lu modellu era lu catechismu tridentinu, a prigonti e ripposthi. In chisthu modu li sassaresi tandu pudiani rippundí a Ca t’a criaddu? cun M’à criaddu Deiu (Quà t’ha creaddu? M’ha creaddu Deyu, i’ la grafia di lu Brevi Catechismu).

(gianni muroni)