Sassari a ritmu di rap

Sabaddu 20 di lampada Sassari sarà triatu di un eventu musiggari dedicaddu a la musigga rap cantadda i’ li linghi di Sardhigna. L’inizziatiba si ciamma Limbas chi currint e l’à pinsadda e orghanizadda la Fondazione Maria Carta cu’ l’aggiuddu di lu Cumuni di Sassari.

A manzanu, a li 10:00, i’ la Bibrioteca Unibessitaria in piazza Fiume, è in programma un cunvegnu dedicaddu a la rerazioni tra musigga e territoriu. So pribisthi l’interventi di Giacomo Serreli, gionnaristha e presidenti di lu comitaddu scientifiggu di la Fondazione Maria Carta, di Antonello Pellegrino, direttori di l’Uffizziu di la linga sardha di l’Assessoraddu regionari di la Cultura e di Andrea Milia e Sara Federico, isthudiosi in campu isthoriggu-musicorogiggu. Lu coordhinamentu è di lu gionnaristha Paolo Ardovino.

Vi sarani puru l’artisthi chi abarani a cantà, a li 18:00, in piazza di lu Culleziu: li Balentia, gruppu naddu in Mogoro i’ lu 1995, fundaddu da Alessio e Andrea Mura, Francesco Floris, Gianmaria Ucciferri e Manuel Lai; Michele Atzori di Castheddu, alias Su Dotori, cunnisciddu puru cumenti Dr. Drer, di li CRC Posse; Michele Concu alias Randagiu Sardu, di Sanluri; Sa Razza, di Iglesias, è a dí Alessandro Sanna e Fabio Leoni; Menhir, li nuaresi Alessandro Gaia e Marco Moro; Mario Basolu alias Malam, eddu puru di Nuaru; Jose Lai alias Lord J, di Quartu; Riccardo Anedda alias Futta, di Sassari; Fabrizio Verachi alias Giocca, eddu puru sassaresu; Riccardo Fadda alias RD (di Stranos Elementos), di Porthu Torra.

Lu rap in Sardhigna, pa’ dillu cu’ li parauri di Giacomo Serreli, à un loggu e una data di nascidda: Iglesias i’ lu 1990. È tandu chi Alessandro Sanna e Massimo Deidda ani foimaddu lu gruppu Sa Razza, pionieri di chisthu generi musiggari.

Limbas chi currint è, i’ l’intinzioni di la Fondazione Maria Carta, un modu pa’ puní impari chistha foima di musigga cu’ la tutera di li linghi fabiddaddi in Sardhigna.

(gianni muroni)