Cast in bronze, prima visioni webtv in SART- Sardinia Television

Giobi 11 di lampada i’ la webtv SART-Sardinia Television, Wim tv di Sardinia Muldimedia, a li 21:00, abarani a traimittí lu filmi Cast in bronze. Dabboi di chistha prima visioni tv, a li 22:28 v’è la reprica, i’ la matessi webtv.

È un corthumetraggiu di la duradda di 28:25 minuti ambientaddu i’ la Sardhigna nuragica. La pellicura è lu contu di dui giobani, Iscurti e Ietocor, chi so raprisintanti di li dui parthi più impurthanti di li sozzieddai antigghi, la ririgiosa e la miritari: la pizzinna è disthinadda a assé una sazzerdhotessa e lu pizzinnu un ghirreri Shardana.

La vidda di chiddu tempu di l’istoria di l’Ìsura, l’Eddai di lu Brunzu, vessu lu 1200 primma di Cristhu, è raprisintadda in manera realisthigga. Pa’ la riarizazzioni di l’obara la produzioni à auddu la consurenzia archeologica di Alessandro Azzeni. E dunca li nuraghi, li pozzi sacri e li tumbi di giganti li vidimmu cumenti dibiani assè candu l’abiani frabbiggaddi, a parthi in drentu e a parthi in fóra.

Sarà pussibiri vidé puru li nabi nuragichi, chi finz’abà abemmu visthu soru i’ lu brunzetti, posthi in mari.

Finze la visthimenta e l’aimi di li ghirreri so isthaddi ricosthruiddi e rearizaddi sigundu tisthimunianzi iconografigghi e archeoligichi. La linga impriadda da l’attori è una ricosthruzioni di una linga prelatina e protosardha fatta da lu prufissori Mauro Maxia.

La pellicura l’ani giradda in Pabillonis, i’ la Giara, in Cala Domestica (Buggerru), i’ lu Parcu dei Sette Fratelli e in Punta Foghe (Tresnuraghes).

Cast in Bronze è una produzioni NOR Films di Frantziscu Cheratzu, cu’ l’aggiuddu di la Regioni Autonoma di Sardigna e di la Fondazione Sardegna Film Commission. Lu registha è Mario Giua Marassi. Li dui protagonisthi so Emanuela Fanni, i’ la parthi di Iscurti, e Mario Massa, chi fazi lu ghirreri Ietocor.

(gianni muroni)

Attività realizzata col contributo della Regione Sardegna – IMPRENTAS 2025-2026. LR 22/2018