Lu sassaresu, una linga cumenti l’althri
Pubbriggaddu lu libru “Linga Sassaresa. Grammatica essenziari” di Fabritziu Dettori. La prisentazioni in piazza Castheddu pa’ la rassegna “All’ombra del Barbacane”
Pa’ la rassegna letteraria “All’ombra del Barbacane”, organizadda da LaC Libraie al Centro, cu’ lu contribuddu di lu Cumuni di Sassari impriendi li finanziamenti pa’ la rete Thàmus, e cu’ la collaborazioni di la Cooperativa di Comunità Ajò Sassari, in pianu di Castheddu, affaccu a lu Barbacane, v’è isthadda a parthi in sera di giobi la prisentazioni di lu libru nobu di Fabritziu Dettori Linga Sassaresa. Grammatica essenziari, pubbriggaddu da Alfa Editrice, 294 pagini e 23 capituri, da la fonorogia e l’orthografia a la sintassi, umpari a 22 ischedi e a un glossariu di parauri. L’attoppu, dedicaddu a lu sassaresu e a cantu e cumenti è impriaddu a li dí d’abà, si è abberthu cu’ l’introduzioni di Roberta Pippia. Gabriella Demontis à inveci coordhinaddu l’inizziatiba. «Lu sassaresu è una linga cu’ li so’ reguri e chisthu afficcu zerchu di fallu cumprindí i’ lu libru», à dittu Dettori, chi, ripuindendi a una prigonta, à ammintaddu l’impegnu chi poni da umbé d’anni i’ l’insegnamentu di lu sassaresu a li pizzinni a ischora. «Chisthu libru nasci da l’ippirienzia di l’imparu daddu i’ l’ischori erementari e asilo e da lizioni i’ li corsi di foimazioni. Vi so approfondimenti parthicurari cumenti li parthi di lu coipu umanu o l’oggetti posthi sobr’a una banca. Appariccià una banca pari una cosa semprizi pa’ noi. Ma funtumà tutti li pezzi chi seivini è impurthanti pa’ un pizzinnu. E so isthaddi li pizzinni mattessi a dí in casa a la mamma e a lu babbu di appariccià impriendi li parauri in sassaresu. Candu dazia imparu a li pizzinni mi dibirthia umbè».
«L’iffida è puru ischribí: i’ lu libru abemmu fissaddu puru cumenti puní li parauri. Lu manuari no à nisciuna pratesa, si no lu d’impuntuglià un intaressu nobu chi possia purthà in tutti li sassaresofoni una cussenzia linguisthigga di cunsidarà lu sassaresu pari a tutti l’althri linghi», à dittu ancora Dettori.
Lu prufissori Antonio Canalis à schrittu la prefazioni e à fabiddaddu in piazza. Pietro Sanna à cantaddu un paggiu di canzoni, ammintendi chi eddu fabedda sassaresu tutti li dí.
(luca foddai)
(Attività realizzata col contributo della Regione Sardegna – IMPRENTAS 2025-2026. LR 22/2018)
