Li bandi pa’ li Candareri d’oru, di prata e di brunzu
Sarani intregaddi la sera di lu 12 di aosthu, umpari a lu Candareri d’oru ippiziari
L’Amministhrazioni comunari à prubbicaddu i’ lu situ web soiu lu bandu di li Candareri d’oru, di prata e di brunzu, che dugna annu so intregaddi primma di la Faradda, da uniguanti anni lu 12 di aosthu (in prizzidenzia la zirimonia era sempri lu 13). Li moduri ani da assè cumpiraddi pa’ pudì parthizipà a l’assegnazioni di li “premi di la nosthalgia”, cumenti so ciamaddi. Lu Candareri d’oru è riseivaddu a lu sassaresu chi da più tempu abìta a l’estheru, luntanu da l’Itaria, e chi torra i’ la ziddai pa’ la Faradda di lu 14 di aosthu. Lu Candareri di prata è inveci assignaddu a lu sassaresu chi vivi i’ la Penisura da più tempu e, puru in chisthu casu, torra in Sassari pa’ la Faradda. L’ulthimu criaddu è lu Candareri di bronzu, disthinaddu a ca no è naddu in Sassari e parò è inogghi residenti da 50 anni a lu mancu. Vi so documenti diffarenti pa’ dugna candaderi. No ani la pussibiriddai di parthizipà un’althra voltha chissi chi l’ani già rizividdu e puru li parenti o affini finz’a lu quarthu gradu.
Tutta canta la moduristhigga è dipuinibiri i’ lu situ web di lu Comuni e i’ li uffiziu di lu settori Cultura, Turismu e Eventi manni in largo Infimmaria Santu Preddu, i’ l’Uffiziu turisthiggu di via Sebastiano Satta e i’ l’Infobox di piazza Castheddu. Li moduri cumpiraddi ani da arribì primma di li 12 di lu tre di aosthu, impriendi la postha elettronigga zirthifigadda o ordhinaria a la casella email cultura@comune.sassari.it. Ma poni assè cunsignaddi a manu a l’uffiziu di largo Infimmaria Santu Preddu.
No è finidda. Acchì, a più chisthi tre premi di la nosthalgia, v’è puru lu Candareri d’ori ippiziari, naddu i’ lu 1991, riseivaddu a isthituzioni, sassaresi e sardhi chi ani daddu lusthru a Sassari e alla Sardhigna. In passaddu ani rizividdu lu premiu passonaggi impurthanti cumenti Gianfranco Zola, Gavino Sanna, Paolo Fresu, Alberto Gazale, Francesco Demuro, Giovanni Lilliu, Beppe Pisanu, Arturo Parisi, Mario Segni, Luigi Berlinguer, Caterina Murino, Liliana Cano, padre Salvatore Morittu, Leonardo Marras, Bianca Pitzorno o isthituzioni e assuzziazioni cumenti la Brigata Sassari, la Corale Canepa, l’Unibessiddai di Sassari, i Bertas e l’Intergremio. L’annu passaddu lu premiu era andaddu a l’Orchestra Jazz della Sardegna.
(luca foddai)
(Attività realizzata col contributo della Regione Sardegna – IMPRENTAS 2025-2026. LR 22/2018)
