Gesgia di lu Carmelo: in Sassari un santuariu diocesanu nobu
È lu primmu di l’Ordhini caimiritanu in Sardhigna. L’azzibeschamu Soddu à emanaddu un decreto soiu
La gesgia di lu Càimini (Carmelo) è dibintadda Santuariu Diocesanu. Dumenigga 12 di triura v’è isthadda la ziribrazioni chi ha signaddu lu riconoscimentu impurthanti, chi dazi varori ippirituari, isthorigu e ririgiosu. La gesgia di lu Càimini (Carmelo) è puru lu primmu santuariu caimiritanu in Sardhigna, loggu chi è liaddu da securi a la comuniddai di la Biadda Vergine di lu Càimini.
A la surenni funzioni ririgiosa ani parthizipaddu l’azzibeschamu di Sassari Francesco Antonio Soddu, chi à prisieduddu la messa, lu padri provinziari di li Caimiritani Gian Domenico Meloni e lu priori di la gesgia padri Salvatore Asta. L’azzibeschamu à binidittu l’althari nobu, dabboi a la lettura chi à fattu lu vicariu ginirari mussingnori Antonio Tamponi, di lu decretu fimmaddu da mussignori Soddu e da lu canzilleri mussignori Antonio Spanu.
«Chisthu loggu è caru assai a tutti noi. Inogghi, candu eu era minori, aggiu culthibaddu lu semmini di la paraura di Deiu. Candu aggiu intesu di la prigunta pa’ l’erezioni a santuariu, prisintadda l’annu passaddu, no aggiu auddu dubbi», à ammintaddu l’azzibeschamu.
La gesgia e lu conventu ani un’isthoria parthicurari. Tuttu inizia i’ lu 1637. I’ lu prinzipiu v’era una cappella, riarizzadda affaccu a l’antigga muraglia medievari. Dabboi parò, i’ la fini di lu securu, fusi fatta la gesgia, più manna, acchì la dibuzioni di li fideri sassaresi era manna. Vi so zincu althari lignei e quattru di predda, tutti di lu XVIII securu. L’althari maggiori è fattu di stuccu e predda, cu’ curonni, agniri e putti. I’ lu mesi di triura di lu 2023 era isthaddu prisintaddu lu restauru di l’isthatua di la Madonna di lu Caimini (Carmelo), turradda, dabboi di poghi dì, sobra all’althari mannu. Un’obbara d’arthi di lu milliseizentu, fatta da un masthru napuritanu chena innommu e chi abia problemi cu’ un parassita, un pabauzzu xilofagu. Ripristhinaddu puru lu curori soiu, cu’ la trama in estofado de oro: era ridipinta e no si cumprindia si era antigga o moderna.
(luca foddai)
(Attività realizzata col contributo della Regione Sardegna – IMPRENTAS 2025-2026. LR 22/2018)
