Tari in Sassari, avvisi pa’ paga da la fini di aosthu

Pa’ lu 2026 li schadenzi pa’ pagà la Tari, la tariffa di lu sevviziu urbanu di l’algha, no sarani li matessi di l’anni passaddi. L’avvisi cu’ li F24 o li bollettini PagoPA sarani priparaddi e inviaddi a tutti canti l’utenti soru pa’ la fini di lu mesi di aosthu. A cumuniggà la nobiddai è l’uffizziu sthampa di lu Comuni di Sassari, chi ipiega chi l’iter di apprubazioni di lu Pianu finanziariu di lu sevviziu urbanu di l’algha e di li tariffi Tari pa’ lu 2026 slittani a la fini di triura. V’è una mutibazioni ippizifigga: li nobiddai i’ la gestioni di lu sisthema regionari d’accuglì e di l’appricazioni di li bonus pa’ li famirii in condizioni di difficulthai socioeconomigga ani purthaddu a chistha dizisioni.

Dunca, li schadenzii di pagamentu so ciambaddi. Sarà parò compitu di lu Cunsigliu comunari vutà una diribara pa’ cunfimmà la variazioni. Li teimini nobi presubirmenti sarani li sighenti: 30 di cabidannu pa’ la primma rata (o unica si si paga tuttu in una voltha sora), 30 di santuaini pa’ la di dui; 30 santandria pa’ la di tre; e 31 di naddari pa’ la quarta e ulthima.

Pa’ li zittadini chi ani dirittu a lu bonus soziari sarà priparaddu un primu avvisu pa’ la parthi di esenzioni. L’althri avvisi sarani cumenti li situazioni chena bonus.

L’avvisu di pabiru è la soruzioni crassigga. V’è parò la possibbiriddai di imprià la foimma elettronica: la documentazioni di la Tari è inviadda cu’ l’email. In chisthu casu l’utenti podarà rizivì l’avvisu o iscariggallu da lu porthari web multiseivizi di lu Comuni di Sassari.

La Tari è la tassa comunari liadda a finanzià lu seiviziu di raccolta di l’algha. Cassisia locari o area chi la produzi à l’obbrigu di pagà la tassa. Si v’è una situazioni di affittu l’obbrigu è di car abita la casa. Dugna comuni dezidi cantu dumandà a l’utenti, sigundu uniguanti parametri ginirari.

(luca foddai)

(Attività realizzata col contributo della Regione Sardegna – IMPRENTAS 2025-2026. LR 22/2018)