Tuttu prontu i’ l’Isthintini pa’ lu Corpus Domini

Dumenigga 7 di lampada è la sorennidai di Corpus Domini. I’ l’Isthintini puru è tuttu prontu pa’ la festha.

A li sei di sera v’è la messa, i’ la gesgia di la parrocchia intituradda a l’Immacolata Concezione. Dabboi v’è la pruzzessioni. Chistha è l’unica occasioni chi i’ lu paesi a occi a L’Asinara escini umpari li dui banderi di la cunfraria di la Beata Vergine Madonna della Difesa, chi lu priori è Pietro Denegri.

La minori accumpagna sempri a Nosthra Signora in tutti canti le zelebrazioni ririgiosi di l’annu. Pa’ lu Corpus Domini parò porthani puru la bandera manna, parthicurariddai chista di la tradizioni ririgiosa di la bidda.

In più vi sarà finz’e la bandera di la festha, la di lu Corpus Domini, purthadda da lu priori Silvestro Schiaffino.

«Semmu onoraddi di custhudí chisthi banderi – à dittu lu presidenti di la cunfraria Antonio Diana – acchí so un simburu di l’istòria di la nosthra comuniddai. La presenzia d’eddi, oramai da anni, dabboi di una serie d’isthudi e di resthauri, è dibintadda un’erementu vibu di li zerebrazioni ririgiosi e zibiri di l’Isthintini. No rapprisentani soru una tisthimunia di lu passaddu, ma un liammu cuncretu tra li generazioni chi z’ani prizziduddu e li chi oggi sighini a mandà addananzi la tradizioni».

Lu Corpus Domini abiani ischuminzaddu a fisthiggiallu i’ lu di tredizi securi pa’ affimmà, contra a l’eretigghi, la varididdai di lu mistheriu di la transustanziazioni. Dabbrimma lu fisthiggiabani soru in Vallonia ma i’ l’annu 1264 lu Pabba Uibanu IV l’abia esthesu a tutta canta la Gesgia.

La dí isthabiridda saristhia lu giobi dabboi di la Triniddai, ma da candu in Itaria n’abiani buggaddu uniguanti festhividdai ririgiosi da dí di festha, i’ lu 1977, la matessi sorthi à auddu lu Corpus Domini, chi da tandu è fisthiggiaddu la dumenigga addabboi.

(gianni muroni)

(Attività realizzata col contributo della Regione Sardegna – IMPRENTAS 2025-2026. LR 22/2018)