Tittia à vintu lu Paru di Siena

I’ l’edizioni di triura di occannu di lu Paru di Siena, rinviadda di una dí pa’ l’eba, à vintu la cuntrada di L’Aquila, chi abia vintu l’ulthima voltha i’ lu 1992 e pa’ chissu era la nonna, è a dí la chi no vinzia da piú tempu.

Lu cabaddu vinzidori è Diodoro e lu fantinu Giovanni Atzeni, a immusgiu Tittia. Pa’ Atzeni è la di dodizi vittorii in chistha gara medievari cu’ li cabaddi pusaddi a la nuda. Lu cabaglieri di Nurri, di mamma tadescha, è lu piú chi à vintu di li fantini in attibiddai.

Dabboi d’assé isciddi quattru volthi da li cannai pa’ no abé rippittaddu l’ordhini d’intradda, la di zincu li cabaddi si so posthi i’ li pusizioni isthabiriddi e lu mossieri à fattu parthí la gara. Lu di setti i’ l’ischieramentu, cu’ l’Onda di rincorsa, Tittia è parthuddu lesthru in primma pusizioni e no l’à lassadda più pa’ tutti e tre l’inghiri di campu.

Inutiri li tentatibi d’aggiumpillu di la Civetta, chi è arribidda la di dui, pa’ l’alligria di li cuntradaiori di l’Aquila, chi torrani a cunniscí la vittoria dabboi di 34 anni.

Lu paru, dedicaddu a Nosthra Signora di Provenzano, l’à pintaddu lu pintori trentinu Ismaele Nones.

Chisthi erani li cuntradi impignaddi, cun cabaddi e cabaglieri:

Onda: Anda e bola; Brigante (Carlo Sanna), di Sindia

Civetta: Viso d’angelo; Gingillo (Giuseppe Zedde)

Giraffa: Diosu de Campeda; Tamurè (Federico Guglielmi)

Leocorno: Volpino; Virgola (Andrea Sanna) di Nuaru

Aquila: Diodoro; Tittia (Giovanni Atzeni) di Nurri

Torre: Entu de Pedra Ulpu; Bellocchio (Enrico Bruschelli)

Bruco: Donrodrigo; Velluto (Dino Pes) di Silanus

Drago: Eberardo; Fastidio (Diego Minucci)

Valdimontone: Canarinu; Lestu (Salvatore Nieddu) di Burgos

Oca: Benitos; Grandine (Sebastiano Murtas) di Santu Lussurgiu

L’appuntamentu è abà lu 16 d’aosthu, cu’ lu paru dedicaddu a Nosthra Signora di Mezaosthu.

(gianni muroni)