Un candareri nobu pa’ lu Gremiu di li Viaggianti
Vennari chi veni i’ la gesgia di Sant’Aousthinu, sedi di la cunfraria, abarà a assè prisintadda l’obara. Vi sarà la binidizioni di l’azzibeschamu Franzischu Soddu
Vennari 31 di triura i’ la gesgia di Sant’Austhinu l’azzibeschamu Franzischu Soddu abarà a dà la binidizioni a lu candareri nobu di lu Gremiu di li Viaggianti (ciamaddu da li sassaresi più manni puru Gremiu di li Carrattuneri), chi dabboi, lu 14 di aosthu, parthiziparà a la so’ primma Faradda. La zirimonia è programmadda pa’ li 18.30, cu’ lu ritu di li Vespri Surenni, prisieduddi da lu vicariu ginirari di l’Azzidiocesi e direttori ipirituari di lu gremiu, mossignori Antonio Tamponi. A la fini di li Vespri lu candareri nobu sarà prisintaddu a li fideri e tutti canti li zittadini prisenti e binidettu da l’azzibeschamu Soddu. Mamentu impurthanti sarà dabboi dananzi a lu sagraddu di la gesgia, candu la candareri abarà a baddà pa’ la primma voltha. Sarani prisenti puru li padrini di l’obbara: lu Comuni di Sassari, cu’ lu sindagu Giuseppe Mascia, e la Fondazione di Sardegna, cu’ lu presidenti Giacomo Spissu.
Arimani, marthi 28 di triura, l’eventu di vennari è isthaddu prisintaddu a giornalisthi e tv, in occasioni di un attoppu convocaddu i’ la sedi di Fondazione di Sardegna in via Carlo Alberto a Sassari, prisenti lu segretariu di li Viaggianti Nicola Senes, lu sindagu Giuseppe Mascia, lu presidenti di l’Intergremiu Fabio Madau; i’ la sala puru lu presidenti Giacomo Spissu. A occi a l’intradda è collocaddu finz’a la Faradda lu candareri antiggu. Chissu nobu infatti è la copia, cun uniguanti diffarenzi i’ li disegni di la parthi superiori, ciamadda “capitellu”, cu’ li pitturi didicaddi a la vidda di Maria. Lu resthu riprendi li mattessi caratteristhigghi di lu candareri antiggu, riarizzaddu in massima parthi i’ lu 1700 e chi è tutt’oggi lu candareri più althu, più di 3,62 metri chi diventani 6,25 cu’ tutti l’addobbi. Lu candareri nobu è pesanti 180 kg, chena addobbi, da la basi a lu capitellu, ed è riarizzaddu da la Falegnameria Bussu, impriendi legnu di pinu. Lu candareri antiggu era primma di lu 1941 di lu Gremiu di li Carradori, no più attibu. Fusi cussì dezisu di affidallu a li Viaggianti, chi pudiani parthipà a la Faradda. I’ lu 1978 fusi riarizzaddu un althru candareri, pa’ iniziativa di Alfonso Russo, cu’ li disegni di Liliana Cano. Li dui candareri parthezipani a la Faradda a anni alterni. Una tradizioni chi sarà mantinudda cu’ lu candareri nobu, mentri lu candareri antiggu sarà posthu i’ lu museu di lu gremiu.
(luca foddai)
(Attività realizzata col contributo della Regione Sardegna – IMPRENTAS 2025-2026. LR 22/2018)
