Isthudià in garera, un’occasioni di rinascidda
Sigundu l’Anvur lu Poru Penitenziariu di l’Unibessidai di Sassari è crassificaddu A-Eccezionale
L’agenzia naziunari Anvur à crassificaddu cu’ lu punteggiu di 38/40 lu Poru Unibessidariu Penitenziariu (PUP) di l’Unibessiddai di Sassari i’ la crassi A-ECCEZIONALE. L’ateneu sassaresu l’abià prisintaddu cumenti unu di li zincu prugetti pa’ la Terza Missioni i’ l’ambitu di la VQR (Valutazione della Qualità della Ricerca). Chistha varutazioni cunfeimma cussì la sorididdai e gariddai di lu progettu PUP.
Quattru so’ l’indicaddori pigliaddi in cunsiderazioni.
Lu primmu è la diminsioni sozziari, economica e culthurari di l’impattu, varutaddu cumenti eccezionari (punti 10). La rendicontazioni è ririgiosa e chisthu erementu vo’ dì chi la recidiva è minori, cu’ l’azioni educatiba chi arregga un beneficiu economicu, un ripaimmiu di 1,5 mirioni di euro e un investhimentu di 300miria euro. Un impattu chi tocca tutti, no soru una elite di isthudianti.
Lu sigundu erementu è relatibu a lu contestu di riferimentu (punti 9.5). Lu Pup cumprendi situazioni cumpricaddi, cun una poburazioni carceraria chi cumprendi Alta Sicurezia e 14bis a lu 60 pai zentu. Inogghi c’è un primatu naziunari: la puburazioni di l’isthudianti è guasi tri volthi la media naziunari, (5,7%). Un libellu chi à un motibu: l’auri so’ cabladdi a lu 100%, primmu poru carcerariu in Itaria.
A lu terzu loggu v’è lu varori aggiuntu multidimensionari (punti 9.5). Iniziatibi cumenti “LiberArte” e lu laboratoriu triatali sobra Shakespeare àni cunsiguenzi pa’ la riabiritazioni emotiba e li percorsi fuimatibi didicaddi a li filieri di li prudotti locari (pescha e massaria) so’ un canari direttu con lu marchaddu di lu trabagliu. La fuimmazioni tocca puru lu personari carcerariu.
L’ulthimu erementu (punti 9) è la capaziddai organizzatiba e gesthionari di libellu mannu cu’ lu partenariaddu di zincu isthituzioni, chi cumprendi Ersu e “Centro per la giustizia minorile”, vo’ dì una leadership isthituziunari forthi. E v’è da signarà la produzioni editoriari “Dentro & Fuori”.
Dunca, lu Poru Penitenziariu è un motibu di orgogliu di l’Unibessidai di Sassari, chi ipendi tempu, dinà e cumpitenzi.
(luca foddai)
(Attività realizzata col contributo della Regione Sardegna – IMPRENTAS 2025-2026. LR 22/2018)
