In Geridu agattaddi tre abitazioni medievari

Un’althra ischubertha impurthanti i’ lu situ di la bidda medievari di Geridu, i’ li campagni di Sossu. La fasi noba di scavi di lu mesi di lampada à arriggaddu nobiddai pa’ l’anarisi di un loggu di lu Mediuevu rurari sardhu. L’intervertu generari anda parò insiriddu in un trabagliu ippiziari pa’ punì una recinzioni a lu situ archeologiggu e un impiantu di videosorveglianza.

Lu 2 di triura li primmi risulthaddi so isthaddi illusthraddi a li giornalisthi propiu a Geridu. Lu direttori di l’ischabu è Marco Milanese, prufissori ordinariu di Archeologia di l’Unibessiddai di Sassari: ««Abemmu acciappaddu tre casi medievari una sobra all’althra i’ lu mattessi loggu. Chisthu parthicurari vo dì chi li casi di la bidda so isthaddi costhruiddi a lu mancu pa’ trizentu anni (da lu mille a lu 1350)». Erani prisenti all’attoppu lu sindagu di Sossu Fabriziu Demelas, l’assessori Federico Basciu e Justin Leid Wenger di l’Unibessiddai di Stanford, prufissori di archeologia, che collabora cun Marco Milanese umpari a tre dottorandi.

L’ischabu era cuncintraddu drentu a un perimetru di una casa brusgiadda i’ lu 1350 e à primmissu di acciappà fasi abitatibi precedenti, cu’ li muri di lu Duizentu. «Li archeologi, l’Unibessiddai, la Soprintendenza e li Comuni trabagliani cu’ dedizioni manna. Finz’a pogghi anni fa era l’Isthaddu a garantì li finanziamenti. Oggi puru l’oneri so in cabbu a li comuni»

Cu’ chisthu ischabu si indaga puru la profondità di lu tempu sobra a li rapporti tra lu situ di la bidda e li tracci di età romana, ciamadda la “bidda de Geriti”. Un althru puntu è la gesgia di Sant’Andrìa, la parrocchia. Gesgia manna gotica medievale, era un edifiziu proporzionaddu a l’innummaru di abitanti (1500) i’ lu 1320. Fu lampadda a terra i’ lu 1800 e li mattoni dabboi impriaddi i’ la parrocchiari di Santu Pantaleu in Sossu.

(luca foddai)

(Attività realizzata col contributo della Regione Sardegna – IMPRENTAS 2025-2026. LR 22/2018)