Animas i’ l’Argentiera
Lu festival musicari organizaddu da Beppe Dettori pruponi dui seraddi i' la locariddai sassaresa
Lu 31 di triura e la primma dí d’aosthu lu festival itineranti Animas, Radici e Futuro fazi tappa i’ l’Argentiera. Da l’ottu di sera, i’ l’anfiteatru La Scala, so in programma dui seraddi musicari dedicaddi massimamenti a la world music ma non soru.
Lu 31, vennari, abarani a cantà: Daniele Gala, accumpagnaddu da lu tasteristha Daniele Barbato; lu duo Dünen e Moretti; NUNC, è a dí Peppino Anfossi e Manuel Attanasio; Mauro Mibelli; Gavino Loche; lu Beppe Dettori Ensemble, umpari cun Raoul Moretti a l’aipa; lu Tamurita Duo, foimaddu da Sergio Piras e Rossella Camellini.
Sabaddu inveci s’abarani a esibí: lu gruppu Eleonora Dee; Yasmin Bradi, accumpagnadda a la chiterra da Giada Moschella; Lelle e Becciu, è a dí Manuel Pagliaro e Antonio Becciu; Syncopated City, foimaddu da Stefano Casti e Irene Salis; Àinos Salvo e Bandito, è a dí Salvatore Canneddu e Antonio Meleddu; Irene Loche; Krasa, gruppu foimaddu da Gabriele Griva, chiterra, Walter Masala, tastheri e sintetizadori, Mauro Tore, bassu, Mirco Doro, chiterra, Giuseppe Fara, batteria.
La musica prupostha anda da lu folk a cover di arthisthi famaddi, da l’erettronigga a lu ska, da lu blues a la fusion.
L’intradda pa’ li dui seraddi è indibbadda.
Lu festival Animas, Radici e Futuro, è organizaddu da Beppe Dettori e Sa Perbeke Associazione Musicale, cu’ l’aggiuddu di Salude&Trigu di la Cammara di Commerciu di Sassari, Fondazione di Sardegna, Istituto Bellieni, Grimaldi Sardegna e German Car.
L’edizioni di occannu è ischuminzadda in abbriri, cun dui appuntamenti, unu in Sassari e l’althru i’ l’Ariera, pa’ sighí in maggiu, torra i’ li dui ziddai, in Guspini e in Perdasdefogu, in lampada, torra in Sassari, e in piú in Sossu e in Terranoba, e in triura in Tempiu e in Arzachena. In cabbidannu so in programma unigaunti seraddi i’ l’Isthintini.
(gianni muroni)
(Attività realizzata col contributo della Regione Sardegna – IMPRENTAS 2025-2026. LR 22/2018)
