Sorso Estate è puru cinema
Ischuminzadda la rassegna Cinema al Parco cun Bandidos e balentes
Lu primmu appuntamentu cu’ lu cinema a l’abberthu di Sorso Estate 2026 è isthaddu, marthi 28, cu’ la pellicura Bandidos e balentes – il codice non scritto.
L’ani proiettadda, a li nobi di sera, i’ l’anfitriatu di lu Parco Vita. Lu sindaggu Demelas umpari cu’ l’assessori a la cultura Basciu ani dezzisu di invisthí in chisthu loggu di lu paesi di la Romangia pa’ fà in modu chi sia non soru un’ippaziu verdhi ma puru un centru d’aggregazioni culturari pa’ la pobburazioni e, in chistu tempu di l’annu, pa’ l’isthragni puru.
La rigenerazioni di l’ippazi pubbrigghi uibani di Sossu, non soru di lu Parco Vita, fazi parthi di lu programma di la giunta, chi à dizzisu di falli vibí finze drent’a la chedda e non soru lu sabaddu e la dumenigga.
Lu filmi chi à inauguraddu la sezzioni cinematografigga di Sorso Estate è di lu registha Fabio Manuel Mulas, naddu a Bono. L’obara è iscidda i’ lu 2017 e tra l’intrepreti soi v’è puru Luca Locci, chi abiani furaddu in Macumeri ‘i lu 1978 candu abia soru setti anni, pa’ liberallu dabboi di tre mesi cu’ lu pagamentu di un rischattu. Li protagunisthi so Elisabetta Contini e Katia Corda.
Bandidos e balentes – il codice non scritto à vintu ‘i lu 2021 lu premiu cumenti megliu action thriller i’ lu Universal Film Festival di New York.
La rassegna cinematografigga, ciamadda Cinema al Parco, fazi parthi di lu cartelloni di Sorso Estate 2026, chi è ischuminzaddu uffizziaimenti lu primmu di lampada cu’ li festheggiamenti pa’ Sant’Antoni. Cinema, musica, triatu, giogghi, balli, festhi ririgiosi, archeorogia e enogastronomia e finze la proiezioni di parthiddi di lu mundiari di fubba ani alligraddu e abarani a sighí a alligrà l’isthadiari sussincu i’ li carreri e i’ li piazzi di la bidda.
Pa’ Cinema al Parco so pribisthi althri quattru appuntamenti, sempri lu marthi.
(gianni muroni)
(Attività realizzata col contributo della Regione Sardegna – IMPRENTAS 2025-2026. LR 22/2018)
