Candu la musigga attoppa a la puisia sassaresa

Chisthu mesi di lampada ha visthu una nubiddai avveru interessanti pa’ Sassari e no soru: puru l’althri e tre municipi undì si fabedda la mattessi linga sassarese poni assisthì a una cosa noba, pa’ óbbara di Beppe Dettori, musicistha chi tutti cunnoscini, e di lu pueta Mario Marras.

Cosa è capitaddu? Beppe à dumandaddu a lu pueta di dalli calche puisia pa’ vidé si v’era la pussibiriddai di fa nascì canzoni nobi in sassaresu, drent’a un prugettu ciamaddu “Poni menti a me” i’ lu Festival ”Radizi e dumani”. Una voltha liggiddi li puisii, Beppe n’à isciubaraddu una dezina e à ischrittu la mùsigga. È naddu un CD assai beddu e lu prugettu è già isthaddu prisintaddu a Porthu Torra, a Sassari e a Sossu e la dì 4 di triura abarà a tuccà a Isthintini.

“Poni mente a me”, il nuovo progetto discografico in sassarese di Beppe Dettori

Beppe ha dittu chi un trabagliu cument’e chisthu po assè avveru impurthanti pa’ la linga sassaresa: imprià la musigga e li versi di puisii chi no so naddi pa’ la musigga è una manera d’effettu pa’ fa vidé chi si po ciambà l’avvizinamentu a la linga cu’ un libellu un poggu più althu in cunfrontu a chissu di  la musigga sassaresa ciamadda tradiziunari o “identitaria”, cumenti dizi calchunu cun un aizu di prisumia. Ma, sia dittu ciaramenti, lu prugettu di Dettori non vo assé  contr’a calchunu e né lu pueta pensa di fà un dippettu a ca à sempri fattu mùsigga a la manera di Del Dro, di Giordo, di Ruzzetta  e di tanti althri brabi cantadori sassaresi. Ma si vo dì chi lu libellu po criscì in megliu, abendi la sensibiriddai attenta a althri bozi e a altrhi maneri chi no siani soru chissi di la cionfra a dugna costhu, cun canzoni chi fazini l’occittu soru a doppi sensi. In pogghi parauri, la linga sassaresa po ancora assé di libellu althu tucchendi sempri dugna cori, puru chissu di li più giòbani, chena pirdhì l’alligria candu vi vo.

I’lu CD di Dettori, tandu, si poni aischulthà canzoni chi fabeddani d’amori, chi fabeddani di zerthi logghi di Sassari, chi fabeddani di puisia e d’incrusioni e Beppe à  induvinaddu tutti li merurii, fendi di dugna puisia una prella priziosa, chi è un paizeri pa’ l’arecci  acchì la mùsigga è propiu trazadora. Chisthu s’è pududdu vidé i’ li quattru occasioni di Porthu Torra, Sassari, Sossu e Isthintini, acchì ca v’era à pigliaddu parthi cun piazeri e cu l’apprausi a l’ippittacuru prisintaddu e aggradissiddu.

Mario Lucio Marras