Moses Concas abarà a tancà lu festival AsinArt 2026

In Fornelli, i’ l’Asinara, lu 5 di aosthu è in programma l’appuntamentu finari cu’ lu festival AsinArt, chi è arribiddu a la di tre edizioni.

Lu pubbriggu podarà gudissi una seradda cun protagunisthi la musica, lu cinema, la letteraddura e la natura di l’isura.

S’ischumenza a li setti di sera cun Simone Azzu. Lu drammaturgu sassaresu à vintu i’ lu 2024 lu Premio Museo Cervi pa’ l’obara Petter: prigioniero politico, dedicaddu a lu matematiggu norvegesu Petter Moen, morthu ‘i lu 1944. I’ l’Asinara parò abarà a fabiddà di lu so’ primmu romanzu, Albergo Savoia, pubbriggaddu da l’edizioni Maestrale. Umpari cun eddu lu poeta, eddu puru sassaresu, Sergio Garau.

Dabboi un althru sassaresu, Pier Piras, cu’ lu so’ bassu acusthiggu, tra world music e folk, abarà a prisintà l’ulthimu dischu soiu, Nautilus, in anteprima.

Da’ la musica si passa a lu cinema cu’ la proiezioni di lu corthumetraggiu Il primo suono, di lu registha castheddanu Andrea Mura, prisenti umpari cu’ lu protagunistha, Giancarlo Murranca.

Pa’ finí e pa’ sarrà la seradda lu musicistha Simone Concas, in arthi Moses Concas, abarà a prisintà Aici andat sa vida, la curonna sonora chi à cumposthu pa’ la pellicura La vita va così, ambientadda in Sardhigna, di lu registha Roberto Milani, cun Diego Abatantuono, Virginia Raffaele e Geppi Cucciari. Lu cumposidori, chi isthazi in Londra, è naddu a Iglesias e fattu mannu i’ la prubinzia di Castheddu. À pubriggadu già quattru album e à vintu l’edizioni 2016 di Italia’s got talent.

AsinArt è organizaddu da CAATS, Cunsorziu Artistas Artesanos Sardos, di Porthu Torra, cu’ l’aggiuddu di lu Cumuni di Porthu Torra, di la Fondazione Sardegna, lu patrociniu di l’Ente Parco dell’Asinara e la partnership di lu festival Il rumore delle pagine.

Pa’ prenotà lu Pass Tour: whatsapp 39 3517315262 o email infocaats@gmail.com.

(gianni muroni)