Tempu di Faradda, eventi e attoppi in chisthi cheddi tra triura e aosthu

Ancora vi voni più di due cheddi, ma i’ la ziddai s’intendi già l’aria di la festha manna. In chista chedda vi so li primi ischadenzi. Oggi, luni 27 di triura, è ischaduddu lu teimini pa’ parthizipà a la Faradda di li Candareri minori, chi sarà lu 5 di aosthu.

Inveci vi so ancora uniguanti dì pa’ prisintà la prigunta di parthipazioni a la faradda di li Candareri Medi, chi sarà la sera di vennari 9 di aosthu. Li giovani porthani a ippadi i’ li carreri di lu zentru isthoriggu li ceri di legnu simiri a chissi manni di lu 14 d’aosthu. Si parthi da larghu Cavallotti, si fazi tuttu corsu Vittorio Emanuele II e, dabboi, corso Vico, finz’a la gesgia di Santa Maria, chi parò pa chistha occasioni è da sempri tancadda. Pa’ parthizipà vi so li moduri da cumpirà cu’ li caratteristhigghi irincaddi i’ lu situ web di lu Comuni, chi oiganizza la Faradda di li Candareri Medi. Tutti l’anni ciamba l’innummaru di ca è prisenti. Una voltha so istaddi più di 25 candareri. L’annu passaddu erani 16: 13 sigundu l’ordhini di la Faradda, più althri tre, ovveru li sigundi vessioni di Orthurani, Piccapidreri e Frabbiggamuri.

Prima di Candareri minori di lu 9 di aosthu v’è parò la festha di lu Gremiu di li Fabbriggamuri, lu dui di aosthu, cumenti tutti l’anni, in onori di Nosthra Signora di l’Agniri, patrona di la cunfraria. Chisthu eventu apri lu mesi didicaddu a la Faradda.

Vi so dabboi althri mamenti parthicurari, chi dugna annu signani lu camminu chi accumpagna finz’a la Faradda di lu 14. Chistha voltha vi sarà, vennari 31 di triura, la benidizioni di lu candareri nobu di lu Gremiu di li Viaggianti (ciamaddi puru Carrattuneri). Sarà l’azzibeschamu Franziscu Antoni Soddu, i’ la gesgia di Sant’Aosthinu, à dà la benidizioni a lu candareri cu’ una zirimonia ririgiosa chi cumprendi li Vespri e a la fini lu primmu baddu di lu candareri.

(luca foddai)

(Attività realizzata col contributo della Regione Sardegna – IMPRENTAS 2025-2026. LR 22/2018)