Lu Prinzipinu, Saint-Exupéry in sassaresu

La figura di Antoine de Saint-Exupéry è una di li piú cunnisciddi di la letteraddura mundiari, massimamenti pa’ lu mistheriu chi ancora oggi caratteriza l’ischumpassa soia, mancarri siani isciddi a pizu, ‘i l’ulthimi vint’anni, tisthimunii chi fazini pinsà a un’abbattimentu di l’apparecchiu soiu i’ lu mari di Marsiglia da parthi di un pirota tedeschu, i’ l’isthadiari di lu 1944.

Lu Prinzipinu no è l’unicu lu libru chi à ischrittu, ma è lu piú cunnisciddu, a lu puntu d’assé lu di tre piú traduziddi a libellu mundiari.

S’acciappani versioni in aggiummai tutti li varieddai linguisthigghi e diarettari di lu mondu, piú di zincuzentu, e la Sardhigna puru è prisenti in chisthu catarogu, cun tutti canti li linghi soi, incrusu lu sassaresu.

A fà vibí in turritanu li passonaggi di chisthu libru isciddu la primma voltha propiu in una traduzioni, chidda ingresa, i’ lu 1943, so isthaddi Mario Lucio Marras e Antonello Bazzu. Poeti, animadori culturari, cu l’assozziazzioni Sinuaria poetarum, ani posthu lu sassaresu a lu sivvizziu di unu di li monumenti di la letteraddura mundiari.

Isciddu pa’ l’edizioni Papiros di Nuaru i’ lu 2018, cu’ lu figuri di l’autori, Lu Prinzipinu z’ammosthra dunca lu protagonistha, un pizzinnu caggiuddu da l’isthelli, l’aviatori chi si fazi amiggu soiu, lu mazzoni e tutti canti l’althri criadduri immaginaddi da Saint-Exupéry, ischuminzendi da la rosa.

Naddu fossi in un tempu chi no era lu soiu, chisthu aviatori-ischrittori z’à dagaddu un’obara piena di poesia e di marincunia, chi prisenta puru calche erementu autobiograffiggu cuaddu i’ li piggi di lu contu.

“Vidimmu be’ soru cu’ lu cori. Li cosi chi contani avveru no li vidimmu cu’ l’occi”, chisthu è forsi lu passaggiu piú famaddu di Lu Prinzipinu, i’ li pararuri di li traduttori.

Grazzie a Marras e a Bazzu tandu l’amantiosi di lu sassersu ani la pussibiriddai di liggí chisthu capolavoro in turritanu puru.

(gianni muroni)