L’Isthintini e Camugli tra passaddu e prisenti
Cun Radici nel Sale l'amministhrazioni isthintinesa vo varorizà l'isthoria di la bidda
Vennari 3 di triura i’ l’Isthintini, i’ lu Museo delle Tonnare, a li sei di sera, è in programma l’attoppu isthituzionari Stintino: una storia da raccontare.
Fazi parthi di un’iniziatiba chi si ciamma Radici nel Sale.
Vi sarà lu sindaggu Rita Vallebella e, in collegamentu video, lu di Camugli Giovanni Anelli. Unu di l’obbietibi di la collaborazioni tra li dui amministhrazioni infatti è un partenariaddu tra lu museo locari e lu Civico Museo Marinaro Gio Bono Ferrari di la bidda ligure.
Da Camugli erani arribiddi, a la fini di lu di dizottu securi, pischadori chi s’erani isthabiriddi a l’Asinara, forsi pròpiu in una di li cari di l’isura chi à pigliaddu l’innommu di Porthu Camugli. Dabboi d’eddi erani arribiddi puru pischadori ponzesi, i’ lu 1814.
Da l’unioni di chisthi comuniddai cu’ li sardhi è nadda la pobburazioni chi i’ lu 1885 à fundaddu la bidda di l’Isthintini, chi, i’ la so’ varieddai locari di la linga turritana e in calchi sanghinaddu, a più di la toponomasthigga, manteni la mimoria di chisthu liammu cu’ la Liguria.
L’amministrazione è fendi un trabagliu di recuperu di l’isthoria e di li tradizioni di chisthu loggu di mari.
Lu cumuni, cu’ lu finanziamentu di la Fondazione di Sardegna, à fattu un pianu pruriennari chi à cumenti coordinadori tènniggu Tommaso Sussarello, pa’ varorizà la tradizioni gastronomica isthintinesa, massimamenti la chi è nadda i’ l’Asinara.
I’ l’attoppu abarani a prisintà, a cura di lu duttò Lepori, l’annullu posthari dedicaddu a li viaggi chi la barcha posthari fazia tra Porthu Torra e lu territoriu di l’Isthintini. Sempri in tema di mari Carlo Giannotti abarà a fabiddà propiu di lu posthari, mentri Alessandro Arru abarà a fabiddà di la nabigazioni di li sardhi antigghi. Pa’ finí Marta Diana fazarà un’interventu dedicaddu a lu patrimoniu archeorogicu di l’Asinara e di l’Isthintini.
(gianni muroni)
