Bertas, sessant’anni di musigga

So naddi i’ lu 1965, ma lu primmu 45 giri d’eddi è di l’annu addabboi. I’ lu 1966 esci infatti Veni in Sardhigna, pubbricaddu cu’ la casa dischugrafigga Arlecchino. L’ischumenzu di li Bertas è isthaddu in un locari di Sassari lu 20 di naddari di lu 1965 e pogghi mesi addabboi so vinzidori di un concussu regionari pa’ giobani cantanti emergenti ciamaddu Sardegna canta. Lu premiu è un contrattu cu’ la Rca Itariana, l’etichetta dischugrafigga più impurthanti di l’anni ’60, undì v’erani l’innommi più manni di la musigga lizzera, da Gianni Morandi a Gino Paoli, da Rita Pavone a Nico Fidenco, e dui giobani masthri arrangiandori cumenti li cumposidori Ennio Morricone e Luis Enriquez Bacalov. Li Bertas so parò dirottaddi a l’etichetta satellite Arc, anagramma di Rca, riseivadda a li proposthi nobi. Lu primmu 45 giri, i’ lu 1967, cu’ Arc, è Fatalità, cantadda in itarianu, branu di Sergio Bardotti pa’ li parauri e Piero Pintucci pa’ la musigga, incisa puru da Ornella Vanoni parò i’ lu 1971. Lu latu B è inveci Mi hai perdonato, lo so, sempri in itarianu. Un successu umbé mannu, chi cunvinzisi la Rca a priparà un long playing cu’ lu mattessi tituru, isciddu parò un annu addananzi, 12 canzoni di autori Rca e cover di brani: tra chisthi Come vuoi che io di li Young Rascals e, massimenti, la famadda La banda (A’ banda) di Chico Buarque de Hollanda, in Itaria suzzessu mannu di Mina. A sessant’anni da allora lu mensiri Raropiù, chi si occupa di isthoria e collezionismu musiggari, à priparaddu i’ l’innummaru di maggiu un arthicuru ippiziari dedicaddu tuttu a la band sassaresa, fimmaddu da lu dirigenti Fernando Fratarcangeli.

Vi so dabboi althri impurthanti incisioni di canzoni cumposthi o arrangiaddi da autori fammiddi cumenti Vito Tommaso, Giancarlo Bigazzi, ancora Sergio Bardotti. Li Bertas parthizipani puru a lu programma terevisibu Settevoci di Pippo Baudo. I’ lu 1970 l’Arc è tancadda e passani direttamenti a la Rca, finz’a lu 1974, candu ciambani casa dischugrafigga passendi a la City. Lu primmu singuru è Badde lontana, althru suzzessu mannu assai. A chisthu seguini tituri in sardhu, una produzioni di libellu althu, e, i’ lu 2007, puru una messa, sempri in sardhu, cu’ la Corale Canepa. Li Bertas ani ciambaddu foimmazioni parecci volthi. I’ lu prinzipiu v’erani li fraddeddi Costa, Antonio, Carlo ed Edmondo, dabboi fesi parthi di la band puru Giuseppe Fiori, oggi so Enzo Paba, Mario Chessa e Marco Piras.

(luca foddai)

(Attività realizzata col contributo della Regione Sardegna – IMPRENTAS 2025-2026. LR 22/2018)