Marco Tedde candidadu sìndigu pro S’Alighera

Custu mangianu 6 de abrile, in Tàtari, in sa villa Ricci de viale Dante, sa coalitzione de tzentrudestra at presentadu paris sos candidados a sìndigu de Tàtari e de S’Alighera pro sas eletziones de s’8 e 9 de làmpadas, comente signale de unione e de difesa de sos interessos de sa Sardigna de su nordovest intrea.

Su nùmene seberadu pro sa localidade de sa costa otzidentale est su de Marco Tedde, veteranu de sa polìtica sarda e italiana.

In s’interventu suo de saludu e de presentatzione a giornalistas e tzitadinàntzia s’esponente de Forza Italia at sutaliniadu s’importàntzia de pensare a livellu territoriale e non petzi locale, pro lòmpere totu paris a su matessi resurtadu.

A pàrrere de Tedde sa crisi sistèmica de custa ala de Sardigna est neghe massimamente de sa matessi classe dirigente de su Cabu de Susu: non polìticos ebbia ma finas mundu econòmicu e culturale.

Su traballu de fàghere est duncas de recuperare sas ocasiones pèrdidas sos annos colados, chi ant penalizadu sa parte setentrionale de s’Ìsula.

Isetende sa costitutzione de sa tzitade metropolitana de Tàtari, chi est un’obietivu istratègicu de sa coalitzione, tocat a cumintzare a resonare, at sighidu Tedde, comente chi esisteret giai una retza territoriale chi potzat pedire e otènnere finantziamentos dae sa Regione.

No est mancadu unu riferimentu a sa frammentatzione de su fronte de su tzentrudestra. Tedde at espressadu su dispraghere pro sa mancàntzia de sos sardistas in sa coalitzione e s’isperàntzia chi su Partidu Sardu si torret a pensare, in modu de torrare a unire totu sas fortzas.

Marco Tedde, avocadu aligheresu, est nàschidu in su 1956. Est istadu sìndigu de S’Alighera, dae su 2002 a su 2012, e cussigeri regionale. Faghet parte de su Cussìgiu Natzionale de Forza Italia.

(gianni muroni)