Sabaddu la Cionfra di Carrasciari
L’initziatiba, orghanizzadda da la Pro Loco di Sassari cu’ lu contributu di li Comuni di Sassari, abarà a ischumintzà a li 6 di parthi in sera da Lu Pianu di Castheddu
Sabaddu 14 di fribaggiu da li 6 di parthi in sera, l’assutziazioni culturari Ischora di Sassaresu, umpari a la “Banda città di Sassari”, abarà a cantà li gobburi di un tempu e d’abà i’ lu tzentru isthoriggu di sassari. L’initziatiba, orghanizzadda da la Pro Loco di Sassari cu’ lu contributu di li Comuni di Sassari, abarà a ischumintzà da Lu Pianu di Castheddu e da inogghi pa li carreri di larghu Cavallotti, piatza Azuni, carrera (via) Luzzati e turradda a Lu Pianu
A volthi s’intendi dì chi «li sassaresi so una manigga di critiggoni», ma chistha è una “virthui” un poggu di tutti li tzittadini di cassisia loggu. E chi noi di chistha “virthui” n’abemmu fattu un’arthi. Noi, no critigghemmu, noi… “Punimmu la cantzoni”!
La gobbura è una cantigga (a cantu pari da cobbola di origini probentzari e ipagnori) chi po assé recitadda in modu monodiggu soru a bozi o accumpagnadda cu’ lu trimpanu; responsuriari: una bozi e lu coru chi torra a dì l’ulthima frasi; bozi e accumpagnamentu a chiterra; bozi cun accumpagnamentu di zanzarra, cucciari, matracchi e trimpanu.
La gobbura ipreca, a rima basgiadda, fatti chi la passona chi l’isthirri riteni impurthanti d’assé purthaddi in piatza e paghisthu po piglià “piggi” dibessi. Olthri a chissi satirigghi e cu’ lu puntzoni a carrasciari, indì si po dì di tuttu “acchì tantu semmu a carrasciari”, diretti mancarri a lu sindaggu o a lu gubennu, vi so li gobburi a “nutitziariu” chi contani li ciarameddi. Una gobbura po assé fintza riburutziunaria, cumenti chissa chi li sassaresi cantabani contru a lu regimi miritari piemuntesu di Claudio Allì Di Maccarani i’ lu 1780. Pa tradizioni vi so, olthri a chissi di carrasciari, li gobburi pa lu Naddari, pa la primma dì di l’annu, pa Pascha d’Annuntziu. Erani tandu li pitzinni chi di casa in casa la cantabani pa dà l’aguri “A tzent’anni li paddro’!”. Lu piazeri era turraddu cun prunardha, carigga, nozi, arantzu o lu chi v’era.
Tandu… sabaddu 14 a li 18 accudiddi in greffa manna pa cundibidí umpari la cionfra di carrasciari! (Assutziazioni culthurari Ischora di Sassaresu)
