Portu Turres in festa pro Santu Gaine

Sàbadu 27 de maju a sas 10 de note cumintzat sa professone chi dae su Duomo de Tàtari at a lòmpere a sa Basìlica de Santu Gaine in ue su pìscamu at a tzelebrare sa missa de su pellegrinu. Est sa prima de sas tzelebratziones religiosas chi finas a lunis ant a annoare, che a ogna annu, sa devotzione de sos portotorresos.

Sas festas ant a cumintzare però a mangianu a sas 10 in su Scoglio Lungo cun sa Regata del Pescatore.

A sas 18 e finas a sas 20,30 in pratza Umberto I est in programma Un nastro per legarsi alla lettura, dedicadu a sos pipios.

Àteras initziativas sunt sa finale de su de trèighi cuncursos Prime Note, a sas 16,30 in s’istitutu cumprensivu n.2 Don Antonio Sanna e un’esibitzione de iscacos de su maistru Yuri Sanna, a sas 17,00 in bia Sassari.

A sas 21,30 in sa turre aragonesa s’at a esibire su grupu Le Vibrazioni.

Domìniga 28, in su parcu San Gavino, ddo’at una mustra fotogràfica naturalìstica. A sas 18 in Balai missa solenne de Pasca de Frores cun sa professone de sos simulacros de sos màrtires turritanos chi torrant a sa crèsia de Santu Gaine.

A sas 20,30 in sas cumbessias e in s’Atrio Comita sunt in programma Il nome di San Gavino e sa rassegna de cantos a chiterra dedicada a Francesco Falchi.

Lunis 29 a sas 10,30, semper in sa basìlica, su pìscamu at a presèdere su Solenne Pontificale.

In fines, a sas 13 in pratza Eroi dell’Onda, ddo’est sa sagra de su pische.