Lu sassaresu no isisthi!

Sassari 2024. Ischumintzà digussì no è a lampalla e imbrettiu. À un significaddu impurthanti acchì segna l’annu di l’amministhrazioni noba di Sassari, e puru acchì è un epuca moderna indì in tuttu lu mondu li minorantzi linghisthigghi ani sempri più amparu da chissi gubenni indì li linghi minoritari vibini. No semmu più i’ l’anni ’50, o ’60, indì no v’era cussentzia linghisthigga pa lu sassaresu. In chiss’anni era cunsidaraddu, chena sindacalizazioni, un “diarettu”, ancora s’intindià forthi in Sassari, e fintzamenta lu gionnari di la tziddai li dedicaba loggu i’ li pagini soi cu’ li puisii. Oggi lu sassaresu è tuteraddu pa leggi da la Regioni da lu 1997 e è tentu contu che “linga” di varorizà da lu 2018, si dazini li tzirthificaddi nara-mi, si finantziani corsi, e althru ancora. Chisthu tuttu e soru da la puritigga e da l’amministhrazioni regionari. E, si no m’imbagliu, nudda è mai arribiddu da lu Comuni di Sassari pa lu sassaresu. Di fattu, lu sassaresu è lagaddu a cantaru di moscha. Pasanendi in isthaddu d’incussentzia, risisthi tra li vuruntari chi credini chi appianu appianu possia turrà a ripirà bè cu’ l’obara di autotutera. Una linga minorizadda e guasi ammatzadda à parò nitzissiddai urgenti d’assé aggiuddadda. Un’oppurthuniddai l’amministhrazioni comunari l’à audda a la Festha Manna indì pudia ipricà calche cosa in più di chissu soritu A tzent’anni! Saristhia ‘sthaddu un esenpiu e un ipuntugliu pa tutti li sassaresofoni a fabiddà lu sassaresu, e un modu pa fà cunniscì la linga di la tziddai puru a li chi accudini da fóra. Parò, e la viriddai dubimmu dilla, chistha amministhrazioni v’è da poggu e, a ischumbattu di la chi v’era primma ‘alche cosa ‘ià l’à fatta… I’ la brochure di li Candareri, infatti, à ischrittu tre parauri in sassaresu: La Faradda; Faradda di li Candareri. È propiu tantu! Ma sigumenti abemmu dittu chi la viriddai anda ditta tutta, la di primma abia posthu in sassaresu la “Ghia pa la diffentziadda” umpari a althri linghi. Una initziatiba vurudda da l’assessori a l’Ambienti e Verdhi pubriggu Antonello Sassu. Piccaddu parò, e lu dimmu a doru mannu, chi tuttu s’è accabaddu inchibi e nisciunu di lu Comuni à purthaddu addanantzi la rasgioni di lu sassaresu drentu a chissu Paratzu.

Un’althra occasioni, pessa, pa varorizà e ischumintzà a dà digniddai a lu sassaresu l’à audda lu sindaggu Giuseppe Mascia in passona a la festha tenta in Carra Manna lu 22 d’aosthu passaddu a la prisintazioni di la Torres indì v’era gintoria avveru. Piccaddu!

Si una linga è l’ippicciu e la sintesi di un territoriu e di un poburu, noi sassaresofoni no isisthimmu propiu, semmu traiparenti fintzamenta pa lu Comuni di Sassari. Un’isthituzioni chi dubaristhia assé campioni di l’aprobu di la linga nosthra no la piglià in cunsideru. Eppuru i’ lu “statuto” l’arthicuru 2 dizi di: “tutela il patrimonio linguistico del territorio”. L’amministhrazioni di Sassari pudaristhia assé una ghia pa l’esercitziu di lu dirittu linghisthiggu di lu sassaresu e di lu sardhu. Chisthu matessi, infatti, fazi parthi di lu patrimoniu e di l’isthoria di la tziddai di Sassari. I’ lu 2021, ma s’acciappa ancora, era isciddu a ripettu di l’isthatutu un librareddu di lu Comuni di Sassari ischrittu in sardhu e in itarianu: Sa Festa e Sa Traditzione – Sos Candeleris, ma in e pa lu sassarsesu la matessi amministhrazioni no fesi nudda. Sia ciaru, no abemmu nudda contru a lu sardhu. La linga nosthra parò è lagadda a contu soiu e è autotuteradda soru da l’amantiosi e da li miritanti vuruntari chi s’autofinantziani pa dalli bozi. Ma chistha bozi fintz’a candu abarà arenu?

Una linga si manteni e isisthi si è fabiddadda da li criadduri, candu è garantiddu lu ricambiu di l’inginnirazioni. Vi so ancora li pitzinni chi iprecani calche paraura in sassaresu, ma, in generari, so soru parauri e no una rasgioni cumpridda. E una ipia chi tzi signara la situazione linghisthigga so propiu li criadduri purthadori di li Candareri minoreddi chi no iprecani lu sassaresu. È una cultura, chissa di la Faradda chi è forthi, chi si imita e si copia i’ li securi, ma chi abà à arriggiddu chissu erementu linghisthiggu fundamentari chi dubaristhia assé a pizu appari e andà a passu cu’ li Candareri. Un poburu po turrà a fabiddà a nobu si acciappa l’ambienti, la famiria, lu babbu la mamma, li giai, chi pudaristhiani intregà a l’inginnirazioni noba lu sassaresu. Pa gumpì a chisthu e abé cussentzia linghisthiga, lu poburu debì abè e vidé l’uffitziariddai soia che l’itarianu e cumenti chisthu debi assé impriaddu. L’amministhrazioni d’abà debi immubissi impressa si no vo assé curipunsabiri di l’interru di lu sassaresu. Debi di cumprindì chi chisthu patrimoniu linghisthigu è una sienda. A lu dirittu di li sassaresofoni a abé ricunnisciddu pienamenti lu sassaresu che linga, si debi aggiugnì lu varori economicu chi chistha risuza è capatzi di dà. Pinsemmu a lu trabagliu chi poni dà l’uffitzi d’ivulthaddura da l’itarianu a lu sassaresu, a la carthellonisthiga, a l’ischora e a tutti chissi attibiddai prisenti i’ la vidda normari di dugna dì. Inné l’Isthaddu itarianu no tuttu è pritzisu: la linga ladina pa esenpiu, fabiddadda da 19miria passoni i’ la prubintzia di Bolzanu, è una minoranza no minorizadda da l’isthituzioni soia e è tuteradda e dazi trabagliu. Soru a Bolzanu, da lu 2001 a lu 2011, li ladinofoni so crisciuddi di 2miria uniddai. Lu ladinu è uffitziari cu’ lu tedeschu e a l’itarianu e, umpari a chisthi, è imparaddu i’ischori. Immaginemuzi una puritica in chistha manera a Sassari… In tuttu lu mondu li minorantzi so tenti contu da l’amministhrazioni propi… Abaremmu a vidé si puru chistha è carigga gnogna o no.

Fabritziu Dettori